ஈரோடு: கரோனா தொற்றுப் பரவலையடுத்து கடந்த ஏப்ரல் 28ஆம் தேதி முதல், சத்தியமங்கலம் வழியாக கர்நாடகா சென்ற அனைத்து அரசு பேருந்துகளும் நிறுத்தப்பட்டன. தொடர்ந்து கர்நாடக அரசுப் பேருந்துகள், தமிழ்நாடு வரவும் அனுமதி மறுக்கப்பட்டது.
இந்நிலையில் தற்போது இரு மாநிலங்களிலும் கரோனா தொற்றுப் பரவல் ஓரளவு குறைந்துள்ளது. இதனையடுத்து இரு மாநிலங்களுக்கிடையேயான அரசு பேருந்து போக்குவரத்தை மீண்டும் தொடங்க, கடந்த ஆகஸ்ட் 21ஆம் தேதி தமிழ்நாடு முதலமைச்சர் ஸ்டாலின் அனுமதியளித்து உத்தரவிட்டார்.
குறைந்த அளவு பயணிகளுக்கே அனுமதி
அதன்படி சத்தியமங்கலத்தில் இருந்து மைசூரு, பெங்களூரு, கொள்ளேகால் ஆகிய பகுதிகளுக்கு இன்று (ஆக.23) தமிழ்நாடு அரசு பேருந்துகள் இயக்கப்பட்டன.
இதனையடுத்து சத்தியமங்கலம் அரசு போக்குவரத்து பணிமனையில் இருந்த பேருந்துகள் அனைத்தும் கிருமி நாசினி தெளிக்கப்பட்டு சுத்தம் செய்யப்பட்டது.