கீழ்பவானி வாய்க்காலில் குளித்த இளைஞர் நீரில் மூழ்கி உயிரிழப்பு

ஈரோடு: பவானிசாகர் அணை அருகே கீழ்பவானி வாய்க்காலில் குளித்த இளைஞர் நீரில் மூழ்கி பரிதாபமாக உயிரிழந்தார்.

ஈரோடு மாவட்டம் பவானி அருகேயுள்ள ஜம்பை சின்னமோளபாளையம் கிராமத்தைச் சேர்ந்தவர் மணி என்பவரது மகன் கார்த்திக். இவர் தனியார் நிறுவனத்தில் பணிபுரிந்து வருகிறார்.

இந்நிலையில், பொங்கல் பண்டிகை முன்னிட்டு தொடர் விடுமுறை என்பதால் கார்த்திக் , சகோதரர் ரமேஷ், நண்பர் கவுதம் ஆகியோருடன் பவானிசாகர் அடுத்துள்ள தொப்பம்பாளையம் கீழ்பவானி வாய்க்கால் பாலம் வாய்க்காலில் குளிக்கச் சென்றுள்ளனர்.

தற்போது கீழ்பவானி வாய்க்காலில் 1800 கனஅடி தண்ணீர் செல்லும் நிலையில் கார்த்தி ஆழமான பகுதிக்குச் சென்றபோது நீச்சல் தெரியாததால் நீரில் மூழ்கி மாயமானார். இதைக்கண்ட ரமேஷ், கவுதம் இருவரும் அக்கம்பக்கம் உள்ளவர்களின் உதவியுடன் நீரில் மூழ்கிய கார்த்தியை மீட்டு சத்தியமங்கலம் அரசு மருத்துவமனைக்கு கொண்டுச் சென்றனர்.

அங்கு பரிசோதித்த மருத்துவர்கள் கார்த்தி ஏற்கெனவே உயிரிழந்ததாகக் கூறினர். இச்சம்பவம் குறித்து பவானிசாகர் காவல் துறையினர் வழக்குப்பதிவு செய்து விசாரணை மேற்கொண்டு வருகின்றனர்.

இதையும் படிங்க: