பணி நிரந்தரம் கோரி தற்கொலைக்கு முயன்ற துப்புரவு தொழிலாளர்..!

ஈரோடு மாநகராட்சியில் உள்ள திட்டப்பணிகளை அவுட் சோர்சிங் முறையில் தனியாரிடம் ஒப்படைக்கும் தமிழக அரசின் முடிவைக் கண்டித்து மாநகராட்சி அலுவலகத்தில் ஒப்பந்த துப்புரவுத் தொழிலாளி தற்கொலைக்கு முயன்ற சம்பவம் பரபரப்பை ஏற்படுத்தியுள்ளது.

ஈரோடு: தமிழக அரசு மாநகராட்சி மற்றும் நகராட்சிகளில் துப்புரவுப் பணியாளர்கள், டிரைவர்கள், பில் கலெக்டர் உள்ளிட்ட பல்வேறு பணிகளுக்கு அவுட்சோர்சிங் மூலம் இனி பணிகள் நிரப்பப்படும் என அரசாணை வெளியிட்டது. இந்த அரசாணை மூலம் தங்களது பணிகள் பாதிக்கப்படும் எனக் கூறி ஈரோடு மாநகராட்சி துப்புரவு பணியாளர்கள் மற்றும் டிரைவர்கள் சுமார் 300க்கும் மேற்பட்டோர் மாநகராட்சி அலுவலகத்தை 2வது நாளாக முற்றுகையிட்டு போராட்டத்தில் ஈடுபட்டனர்.

இந்நிலையில் தொடர் காத்திருப்பு போராட்டத்தில் ஈடுபட்டு வரும் நிலையில், மாநகராட்சி ஒப்பந்தத் துப்புரவு ஊழியர் மோகன்ராஜ் மாநகராட்சி அலுவலகம் மீது ஏறி தற்கொலைக்கு முயன்றுள்ளார். இதனையடுத்து அங்குப் போராட்டத்தில் ஈடுபட்ட சக ஊழியர்கள் மற்றும் பாதுகாப்புப் பணியிலிருந்த காவல்துறையினர் அவரை பத்திரமாக மீட்டனர்.

கடந்த 14 ஆண்டுகளாக வேலை செய்து வரும் நிலையில் பணிகள் அவுட்சோர்சிங் மூலம் தரப்பட்டால் தங்களுக்குக் குறைந்த ஊதியமே வழங்கப்படும் என்றும், தங்களைப் பணி நிரந்தரம் செய்ய வாய்ப்பு இல்லை என்பதால் போராட்டத்தில் ஈடுபடுவதாகத் தெரிவித்தனர்.

தமிழக அரசு இந்த பிரச்சனையில் தலையிட்டு உடனடியாக அரசு ஆணையை ரத்து செய்யவில்லை என்றால், தொடர் போராட்டத்தில் ஈடுபட உள்ளதாகவும் தெரிவித்தனர்.

தொடர்ந்து போராட்டத்தில் ஈடுபட்டு வரும் பணியாளர்களிடம் மாநகராட்சி மேயரின் கணவரும், திமுக நகரச் செயலாளருமான சுப்பிரமணி பேச்சுவார்த்தையில் ஈடுபட்ட சம்பவம் பணியாளர்கள் மத்தியில் அதிர்ச்சியை ஏற்படுத்தி உள்ளது.

மேயர் மற்றும் மாநகராட்சி ஆணையாளர் ஆகியோர் இருக்கும்போது மாநகராட்சி அலுவலகத்தில் திமுக கட்சியைச் சேர்ந்தவர்கள் தலையிட்டு பேச்சுவார்த்தை நடத்தி இருப்பது பெரும் பேசு பொருளாகி இருக்கிறது.

இதையும் படிங்க:ஈரோட்டில் அழுகிய நிலையில் காட்டிற்குள் கிடந்த பெண் சடலம்...