தமிழ் சினிமாவில் முரட்டுத்தனமான வில்லன் கதாபாத்திரங்களை ஏற்று நடித்துவந்தவர் மன்சூர் அலிகான். சினிமாவில் தான் வில்லனாக இருந்தாலும் நாம் தமிழர் கட்சியில் இணைந்து சமூக அக்கறையுடன் மக்களின் பிரச்னைகள் குறித்து அவ்வப்போது தனது கருத்துகளை கூறி மக்கள் மனங்களில் நாயகனாய் உருவெடுத்துள்ளார் என கூறப்படுகிறது.
மேலும், திண்டுக்கல் தொகுதியில் நாம் தமிழர் கட்சி சார்பில் மக்களவைத் தேர்தலில் போட்டியிடும் இவர், தேர்தல் தேதி அறிவிக்கும் முன்பே தொகுதி மக்களை சந்தித்து தனது பரப்புரையை தொடங்கினார்.
இளநீர் வியாபாரம் செய்தல், வீட்டில் உள்ள பெண்களுக்கு தேங்காய் சட்னி அரைத்து கொடுத்தல், காலணி தைக்கும் தொழிலாளியுடன் சேர்ந்து காலணிகளை தைத்துக் கொடுத்தல், டீ மாஸ்டராய் மாறி தேநீர் அளித்தல் என பல்வேறு வகைகளில் நூதன முறையில் பரப்புரை செய்துவந்தார்.
இந்நிலையில், நத்தம் தொகுதியில் உள்ள கோபால்பட்டி வாரச்சந்தையில் நேற்று மாலை மன்சூர் அலிகான் பரப்புரை செய்தார்.அப்போது, வண்ணக்கோழி குஞ்சுகள் விற்பனை செய்தார். இதன் பின்னர்காய்கறி கடையில் விற்பனையாளராய் மாறி பாகற்காய் சாப்பிட்டால் சர்க்கரை வராது என விழிப்புணர்வு பரப்பரையுடன் சேர்த்து தேர்தல் பரப்புரையும் செய்தார்.
முன்னணி கட்சி வேட்பாளர்கள் வாகனங்களில் சென்று மேடைகள் அமைத்து வாக்குகள் சேகரித்துவரும் நிலையில் நடிகர் என்ற தலைக்கனம் இல்லாமல் மக்களோடு மக்களாக கலந்து அவர் வாக்கு சேகரிப்பது அனைத்துத் தரப்பினரையும் வெகுவாய் கவர்ந்துள்ளது.