கோயில் பூசாரி தற்கொலை வழக்கு; ஓபிஎஸ் தம்பி நீதிமன்றத்தில் ஆஜர்!

OPS brother appears in court: தேனி மாவட்டம் கைலாசப்பட்டி கோயில் பூசாரி தற்கொலை வழக்கில் முன்னாள் முதலமைச்சர் ஓ.பன்னீர்செல்வத்தின் தம்பி ஓ.ராஜா திண்டுக்கல் நீதிமன்றத்தில் ஆஜரான நிலையில், வழக்கு அடுத்த மாதம் 5ஆம் தேதிக்கு ஒத்தி வைக்கப்பட்டது.

திண்டுக்கல்: தேனி மாவட்டம், பெரியகுளம் கைலாசப்பட்டி கோயில் பூசாரியாக நாகமுத்து என்பவர் பல ஆண்டுகளாக இருந்து வந்தார். இந்நிலையில் அவர், கடந்த 2012ஆம் ஆண்டு டிசம்பர் 8 அன்று தற்கொலை செய்து உயிரிழந்தார். அதனைத் தொடர்ந்து, பூசாரியை தற்கொலைக்குத் தூண்டியதாகக் கூறி அப்போதைய பெரியகுளம் நகராட்சித் தலைவரும், தமிழக முன்னாள் முதலமைச்சர் ஓ.பன்னீர்செல்வத்தின் தம்பியுமான ஓ.ராஜா, மணிமாறன், லோகு, சிவகுமார், ஞானம், சரவணன் மற்றும் பாண்டி உள்பட 7 பேர் மீது பெரியகுளம் தென்கரை போலீசார் வழக்குப் பதிவு செய்தனர்.

அந்த வகையில், இந்த வழக்கு திண்டுக்கல் மாவட்ட பட்டியல் வகுப்பினர் மற்றும் பழங்குடியினர் சிறப்பு அமர்வு நீதிமன்றத்தில் நடைபெற்று வந்தது. இந்த வழக்கு தொடர்பாக அரசுத் தரப்பில் 5 சாட்சிகளிடம் விசாரணை நடத்தி முடிக்கப்பட்டது. அதனைத் தொடர்ந்து, இந்த வழக்கில் அரசு தரப்பு சாட்சிகள் ஐந்து பேரையும் மீண்டும் குறுக்கு விசாரணை செய்ய வேண்டும் என ஓ.ராஜா தரப்பில் மனுத் தாக்கல் செய்யப்பட்டது. அந்த மனுவை நீதிபதி தள்ளுபடி செய்தார்.

இதனை எதிர்த்து சென்னை உயர் நீதிமன்ற மதுரைக்கிளையில் ராஜா தரப்பு மனுத் தாக்கல் செய்தனர். அங்கும் மனு தள்ளுபடி செய்யப்பட்டது. இந்நிலையில், தற்பொழுது திண்டுக்கல் மாவட்ட பட்டியல் வகுப்பினர் மற்றும் பழங்குடியினர் சிறப்பு அமர்வு நீதிமன்றத்தில் மீண்டும் இந்த வழக்கு நடைபெற்று வருகிறது.

இவ்வழக்கில் சம்பந்தப்பட்ட பாண்டி என்பவர் இறந்து விட்டதால் மீதமுள்ள ராஜா உள்பட 6 பேர் இன்று (செப்.27) நீதிமன்றத்தில் ஆஜராகினர். இதனையடுத்து பொறுப்பு நீதிபதி சரண், வழக்கை வருகிற அக்டோபர் 5ஆம் தேதிக்கு ஒத்தி வைத்தார்.

இதையும் படிங்க:எல்.முருகன் மீது முரசொலி தொடர்ந்த அவதூறு வழக்கை விசாரணை செய்ய இடைக்கால தடை விதிப்பு!