துப்பாக்கியுடன் திரிந்த மூன்று பேர் அதிரடி கைது; நடந்தது என்ன?

திண்டுக்கல்: ஒட்டன்சத்திரத்தில் கைத்துப்பாக்கியுடன் சுற்றித் திரிந்த மூவரை காவல்துறையினர் கைது செய்தனர்.

திண்டுக்கல் மாவட்டம் ஒட்டன்சத்திரம் பகுதியில் கைத்துப்பாக்கியுடன் மூவர் சுற்றித் திரிவதாக காவல்துறையினருக்கு தகவல் கிடைத்தது. அதன் பேரில் காந்திநகர் சென்ற காவல்துறையினர் கைத்துப்பாக்கி வைத்திருந்த ஒருவரைக் கைது செய்தனர். பின்னர், விசாரணையில் கைத்துப்பாக்கியுடன் பிடிபட்ட நபர் கேரள மாநிலத்தைச் சேர்ந்த விபின் என தெரியவந்தது. மேலும் அவர் கொடுத்த தகவலின் பேரில் ஒட்டன்சத்திரம் காந்தி நகரைச் சேர்ந்த பிரகாஷ், சத்திரப்பட்டி வேலூரைச் சேர்ந்த செல்வராஜ் ஆகியோரை காவல் துறையினர் பிடித்து விசாரணை செய்தனர்.

அதில் வேடசந்தூர் குஜிலியம்பாரையைச் சேர்ந்த சக்திவேல் என்பவரிடம் டிரைவராக விபின் பணிபுரிந்து வந்ததாகவும், நேற்று முன்தினம் இரவு சக்திவேல் மனைவியை அதே ஊரைச் சேர்ந்த ஜெகதீசன் என்பவர் தாக்கியதாகவும், அதற்கு பதிலடி கொடுக்கும் விதமாக ஜெகதீசனைத் தாக்க பிரகாஷ், செல்வராஜ் ஆகியோரை அழைத்துச் செல்ல விபின் இருவரையும் கூட்டிச் செல்ல ஒட்டன்சத்திரம் வந்த போது காவல்துறையிடம் பிடிபட்டது தெரியவந்தது.

இதையடுத்து, மூன்று பேரையும் காவல்துறையினர் கைது செய்து ஒட்டன்சத்திரம் நீதிமன்றத்தில் ஆஜர்படுத்தி சிறையில் அடைத்தனர். மேலும் அவர்களிடமிருந்து மூன்று அறிவாள்கள், கைத்துப்பாக்கி ஆகியவற்றை காவல் துறையினர் பறிமுதல் செய்தனர்.