கொடைக்கானலில் மண்சரிவு: சாலை போக்குவரத்து துண்டிப்பு

திண்டுக்கல்: கொடைக்கானல் அருகே அடுக்கம் கிராமத்தில் ஐந்து இடங்களில் மண்சரிவு ஏற்பட்டுள்ளதால் அக்கிராமத்திற்கு செல்லும் சாலைகள் துண்டிக்கப்பட்டுள்ளன.

திண்டுக்கல் மாவட்டம் கொடைக்கானலில் கடந்த ஒரு மாத காலமாக தொடர் கனமழை பெய்து வருகிறது. கடந்த 10 நாட்களில் பெய்த மழையின் அளவு மட்டும் 50 செ.மீ.க்கும் அதிகமாக பதிவாகியுள்ளது.

இந்த கனமழையின் காரணமாக அடுக்கம் கிராமத்தின் வழியாக செல்லும் பெரியகுளம் சாலையில் ஐந்துக்கும் மேற்பட்ட இடங்களில் பாறை விழுந்து மண்சரிவு ஏற்பட்டுள்ளது. கிராமத்திற்கு செல்லும் இருசாலைகளின் துண்டிப்பால் கிராம மக்கள், பள்ளி மாணவர்கள் கிராமத்தை விட்டு வெளியேற முடியாமல் சிரமம் அடைந்து வருகின்றனர்.

தற்போது நெடுஞ்சாலைத்துறையினர் மண்சரிவை அகற்றும் பணிகளில் ஈடுபட்டுள்ளனர். இருந்தபோதும் கூடுதல் பணியாளர்களை நியமித்து சாலையை துரிதமாக சீரமைக்க வேண்டும் என்று அப்பகுதி மக்கள் கோரிக்கை விடுத்துள்ளனர்.

இதையும் படிங்க:மாநில அரசைக் கண்டித்து விவசாயிகள் அரை நிர்வாணப் போராட்டம்!