திண்டுக்கல்: கொடைக்கானல் தனியார் பள்ளியைச் சேர்ந்த மாணவன் அஜய் பிரசன்னன். இவர் 12ஆம் வகுப்பு படித்து வருகிறார். அஜய் பிரசன்னன் பிட்ஜெட் ஸ்பின்னர்(Fidget Spinner) சுழற்றி உலக கின்னஸ் சாதனைப் படைத்திருந்தார்.
அதே மாணவர் ஒரு நிமிடத்தில் 82 முறை தோப்புக்கரணமிட்டு இந்தியன் புக் ஆஃப் ரெக்கார்ட்ஸ் புத்தகத்திலும் இடம் பெற்றிருந்தார்.
தற்போது தனது பழைய சாதனையை முறியடிக்கும் விதத்தில், ஒரு நிமிடத்தில் 88 முறை தோப்புக்கரணமிட்டு ஆசியா புக் ஆஃப் ரெக்கார்ட்ஸ் புத்தகத்தில் இடம் பெற்றுள்ளார். இதன் காரணமாக மாணவருக்குத் தனியார் விடுதியில் வைத்து பாராட்டு விழா நடத்தப்பட்டது.
இதுகுறித்து மாணவன் அஜய் பிரசன்னன் பேசுகையில், 'தோப்புக்கரணத்தால் நினைவாற்றல் சக்தி அதிகரிக்கும். இதனால் அனைவரும் பாரம்பரிய கலையான தோப்புக்கரணத்தை செய்யவும். மேலும் தோப்புக்கரணத்தை ஒலிம்பிக்கில் சேர்க்க வேண்டும்' என்றார்.