'கரோனா பணிச்சுமையைக் குறைக்க வேண்டும் - இல்லையெனில்...!'

திண்டுக்கல்: கரோனா பணிச்சுமையைக் குறைக்க தமிழ்நாடு அரசு நடவடிக்கை எடுக்க வேண்டும் இல்லையென்றால் போராட்டத்தில் ஈடுபடப்போவதாகத் தமிழ்நாடு ஊராட்சி செயலாளர்கள் சங்க மாநிலத் தலைவர் ஜான் போஸ்கோ தெரிவித்துள்ளார்.

திண்டுக்கல்லில் நேற்று (ஏப். 30) தமிழ்நாடு ஊராட்சி செயலாளர்கள் சங்க மாநிலத் தலைவர் ஜான் போஸ்கோ பிரகாஷ் செய்தியாளர்களிடம் பேசுகையில்,

"தமிழ்நாடு முழுவதும் 12 ஆயிரத்துு 625 கிராம ஊராட்சிகள் உள்ளன. இந்த ஊராட்சிகளில் குடிநீர், தெருவிளக்கு, சுகாதாரம், அரசுத் திட்டப்பணிகள், ஆவணப் பராமரிப்பு, வரிவசூல் எனப் பல இடைவிடாத பணிகளை ஊராட்சி செயலாளர்கள் மேற்கொண்டுவருகின்றனர்.

இந்நிலையில் தற்போது தமிழ்நாட்டில் கரோனா தொற்று தீவிரமடைந்துவருகிறது. இதன் காரணமாக தொற்றால் பாதிக்கப்பட்ட வீடுகளில் ஒட்டுவில்லை ஒட்டும் பணி, முகக்கவசம் அணியாதவர்களுக்கு அபராதம் விதிக்கும் பணி, வெளியூர்களிலிருந்து உள்ளூருக்கு வருவோரைக் கணக்கெடுக்கும் பணி போன்றவற்றால் பணிச்சுமை அதிகமாக உள்ளது.

இதனால் ஊராட்சி செயலாளர்கள் மன அழுத்தத்திற்கு ஆளாகின்றனர். ஆகவே தமிழ்நாடு அரசு பணிச்சுமையைக் குறைக்க உடனடியாக நடவடிக்கை எடுக்க வேண்டும்.

மேலும், கரோனா பணிக்கு கிராம நிர்வாக அலுவலர்கள், கிராம உதவியாளர்கள், சத்துணவு அங்கன்வாடி பணியாளர்கள், ஆசிரியர்கள் உள்ளிட்ட இதர அரசுப் பணியாளர்களையும் இப்பணியில் ஈடுபடுத்த வேண்டும்.

தங்களது கோரிக்கையை ஏற்று தமிழ்நாடு அரசு உடனடியாக நடவடிக்கை எடுக்க வேண்டும். இல்லையென்றால் வேறு வழியில்லாமல் தமிழ்நாடு அரசைக் கண்டித்து போராட்டத்தில் ஈடுபடுவோம்" எனத் தெரிவித்தார்.