கொடைக்கானலில் தீக்காயங்களுடன் உயிருக்கு ஆபத்தான நிலையில் சென்னை இளைஞர் மீட்பு!

கொடைக்கானலில் வனப்பகுதியில் சென்னையைச் சேர்ந்த இளைஞர் உடலில் மிகுந்த தீக்காயங்களுடன் உயிருக்கு ஆபத்தான நிலையில் மீட்கப்பட்டார். அவர் தற்கொலைக்கு முயன்றாரா? என போலீசார் விசாரணை மேற்கொண்டு வருகின்றனர்.

திண்டுக்கல்:திண்டுக்கல் மாவட்டம், கொடைக்கானலில் அப்சர்வேட்டரி வனப்பகுதியில் இன்று(ஏப்.26) இளைஞர் ஒருவர் உடலில் தீக்காயங்களுடன் கிடந்துள்ளார். இதனை விறகு எடுப்பதற்காகச் சென்ற பெண்கள் பார்த்து அதிர்ச்சியடைந்துள்ளனர்.

பின்னர் இதுகுறித்து போலீசாருக்குத் தகவல் கொடுத்தனர். சம்பவ இடத்துக்கு விரைந்த காவல்துறையினர் மற்றும் தீயணைப்புத் துறையினர், 108 ஆம்புலன்ஸ் உதவியுடன் உயிருக்கு ஆபத்தான நிலையில் இருந்த இளைஞரை மீட்டு கொடைக்கானல் அரசு மருத்துவமனைக்கு அனுப்பி வைத்தனர். அவருக்கு கொடைக்கானல் அரசு மருத்துவமனையில் தீவிர சிகிச்சை அளிக்கப்பட்டு, பின்னர் மேல் சிகிச்சைக்காக தேனி அரசு மருத்துவமனைக்கு அனுப்பி வைத்தனர்.

இந்தச் சம்பவம் தொடர்பாக போலீசார் விசாரணை மேற்கொண்டனர். முதற்கட்ட விசாரணையில், மீட்கப்பட்ட இளைஞர் சென்னை கொளத்தூர் பகுதியைச் சேர்ந்த ஜெகதீஸ்வர் என்பதும், அவர் இருசக்கர வாகனத்தில் கொடைக்கானலுக்கு வந்ததும் தெரியவந்தது. இதையடுத்து ஜெகதீஸ்வர் தற்கொலைக்கு முயன்றாரா? அல்லது கொலை செய்யும் நோக்கில் யாரேனும் தீ வைத்தார்களா? என்பது தொடர்பாக விசாரணை நடத்தி வருகின்றனர்.