முட்புதரில் பதுக்கி விற்பனை செய்யப்பட்ட 1,460 மது பாட்டில்கள் பறிமுதல்

திண்டுக்கல் அருகே சட்டவிரோதமாக விற்பனை செய்வதற்காக வைத்திருந்த 1,460 மது பாட்டில்களை காவல் துறையினர் பறிமுதல் செய்தனர்.

திண்டுக்கல்: நத்தம் சாலையில் மது பாட்டில்கள் பதுக்கி விற்பனை செய்யப்படுவதாக காவல் துறையினருக்கு ரகசியத் தகவல் கிடைத்தது. இதையடுத்து அங்குள்ள நல்லாம்பட்டி பகுதியில் தனிப்பிரிவு காவல் துறையினர் சோதனை நடத்தினர்.

இச்சோதனையில் முட்புதரில் பதுக்கி வைக்கப்பட்டிருந்த 1,460 மது பாட்டில்கள் கண்டறியப்பட்டு பறிமுதல் செய்யப்பட்டன.

மேலும், நடுவனூர் பகுதியைச் சேர்ந்த ஜெயப்பிரகாஷ் (29) என்பவர் சட்டவிரோதமாக மது பாட்டில்களை பதுக்கி விற்பனை செய்தது விசாரணையில் தெரிய வந்ததை அடுத்து காவல் துறையினர் நேற்று (ஜூலை.03) அவரைக் கைது செய்தனர்.

இதையும் படிங்க: கார் மீது லாரி மோதல் - 3 பேர் உயிரிழப்பு