காவிரி ஆற்றில் 20,500 கன அடியாக நீர்வரத்து அதிகரிப்பு!

தருமபுரி: கர்நாடக மாநிலத்தில் பெய்துவரும் கனமழை காரணமாக காவிரி ஆற்றில் திறந்துவிடப்பட்டுள்ள நீரின் அளவு 20,500 கன அடியாக அதிகரித்துள்ளது.

கர்நாடக மாநிலத்தில் கடந்த இரு தினங்களாகத் தொடர்ந்து மழை பெய்துவருகிறது. இதன் காரணமாக கபினி மற்றும் கிருஷ்ணராஜசாகர் அணைகளில் இருந்து 20,500 கன அடி நீர் காவிரி ஆற்றில் திறந்துவிடப்பட்டுள்ளது.

திறக்கப்பட்டத் தண்ணீா் இன்று மாலைக்குள் தமிழ்நாடு எல்லையான பிலிகுண்டுக்கு வரும் என எதிர்பார்க்கப்படுகிறது. தற்போது ஒகேனக்கல்லுக்கு வரும் நீர்வரத்து 5,000 கனஅடியாக உள்ளது.

முன்னதாக ஒகேனக்கல்லில் சுற்றுலாப் பயணிகள் குளிக்க மாவட்ட நிர்வாகம் சார்பில் விதிக்கப்பட்ட தடை 68ஆவது நாளாக நீடிக்கிறது. மாமரத்து பள்ளம் பகுதியில் இருந்து பரிசல் இயக்க நேற்று மாவட்ட நிர்வாகம் அனுமதி அளித்தது குறிப்பிடத்தக்கது.

இதையும் படிங்க: ப.சிதம்பரம் அமலாக்கத்துறையால் கைது!