சிறந்த காவல் நிலைய விருது தருமபுரி நகர காவல் நிலையம் மூன்றாம் இடம்.

தமிழ் நாட்டில் சிறந்த காவல் நிலையங்களில் தர்மபுரி நகர காவல் நிலையம் மூன்றாம் இடத்தை பெற்றுள்ளது.

தமிழ்நாடு முழுவதும் கடந்த ஆண்டு முதல் சிறந்த சேவையாற்றும் காவல் நிலையங்களுக்கு பரிசுகளும், பாராட்டு சான்றிதழும் ,கேடயமும் வழங்கப்படும் என தமிழக அரசு அறிவித்திருந்தது. வருகிற குடியரசு தின விழாவில் சிறந்த காவல் நிலையங்களுக்கு பரிசு வழங்குவதற்கான மூன்று காவல் நிலையங்கள் தேர்வு செய்யப்பட்டுள்ளது. இதில் தருமபுரி நகர காவல் நிலையம் மூன்றாவது இடத்தை பெற்றுள்ளது.

தருமபுரி மாவட்ட காவல்துறை 3 உட்கோட்ட பிரிவுகளாக பிரிக்கப்பட்டு 27 காவல் நிலையங்கள் செயல்பட்டு வருகின்றன. இதில் 900க்கும் மேற்பட்ட காவலர்கள் பணியாற்றி வருகின்றனர். தருமபுரி நகர காவல் நிலையம் ஆங்கிலேயர்கள் காலத்தில் 1862-ம் ஆண்டு தொடங்கப்பட்டது. இந்த காவல் நிலையத்தில் ஒரு ஆய்வாளர், 4 உதவி ஆய்வாளர்கள் 80 காவலர்கள் பணியாற்றி வருகின்றனர்.

சிறந்த காவல் நிலையத்திற்கான விருது பெற தகுதிகள் :

ஒவ்வொரு காவல் நிலையங்களுக்கு வரும் பொதுமக்களிடம் புகார் மனுக்களை பெறுதல், குற்றவாளிகளை கண்டுபிடித்தல், அனைத்து பதிவேடுகளும் கணினியில் பயன்படுத்துதல், கொலைக் குற்றங்களை விரைந்து கண்டுபிடித்தல், காவல் நிலையத்தில் சுற்றுச்சூழலை பராமரித்தல், குடிநீர், கழிப்பறை உள்ளிட்ட அடிப்படை வசதிகளை மேம்பாடு செய்தல், பதிவேடுகளை சீரிய முறையில் பராமரித்தல் உள்ளிட்ட 27 வகையான கட்டுப்பாடுகளை விதித்தது. இதனை சரியாக பின்பற்றும் காவல் நிலையங்களே தகுதி பெறும் என தமிழக அரசு அறிவித்திருந்தது.

இதனைத் தொடர்ந்து தருமபுரி நகர காவல் நிலைய ஆய்வாளர் ரத்தினகுமார் காவல் நிலையத்திற்கு அருகில் பூச்செடிகளை வைத்து, பராமரித்து, காவல் நிலையங்களுக்கு வரும் பொதுமக்களை கனிவோடு பேசி புகார் மனுவை பெற்று, உரிய தீர்வு காண காவலர்களை சுழற்சி முறையில் பணியமர்த்தி வந்துள்ளார். மேலும் அளிக்கவரும் பொதுமக்களுக்கு சுத்திகரிக்கப்பட்ட குடிநீர் உள்ளிட்ட பல்வேறு வசதிகளை செய்துள்ளார்.

கடந்த சில மாதங்களுக்கு முன்பு காவல்துறை உயர் அதிகாரிகள் குழு தருமபுரி நகர காவல் நிலையத்திற்கு நேரில் வந்து ஆய்வு செய்து ஆவணங்களை சரிபார்த்து, ஒவ்வொரு ஆவணத்திற்கும் தனித்தனியாக மதிப்பெண்களை வழங்கி தமிழக அரசுக்கு அனுப்பி வைத்துள்ளனர்.

இந்நிலையில் இந்த காவல் நிலையத்திற்கு தமிழ்நாட்டின் மூன்றாவது சிறந்த காவல்நிலையம் என்ற விருதினை அரசு அறிவித்துள்ளது. இதற்கான விருதினை வருகிற குடியரசு தினவிழாவில் காவல் ஆய்வாளர் ரத்தினகுமார் முதலமைச்சரிடம் இருந்து பெற உள்ளார். தமிழகத்தில் சிறந்த காவல் நிலையங்களில் மூன்றாவது இடத்தை தருமபுரி நகர காவல் நிலையம் பெற்றிருப்பது தருமபுரி மக்கள் மத்தில் மிகுந்த பாராட்டையும், வரவேற்பையும் பெற்றுள்ளது.

இதையும் படிங்க :கோரிக்கைகளை நிறைவேற்றுக: ஓய்வுபெற்ற போக்குவரத்துக் கழக ஊழியர்கள் ஆர்ப்பாட்டம்