5, 8ஆம் வகுப்பு பொதுத் தேர்வு ரத்து: கூட்டணியில் இருந்துகொண்டே பட்டாசு வெடித்த பாமக

தருமபுரி: 5, 8ஆம் வகுப்புகளுக்கு பொதுத் தேர்வு ரத்து செய்யப்பட்டதைத் தொடர்ந்து பாமகவினர் அதனை பட்டாசு வெடித்து கொண்டாடினர்.

தமிழ்நாடு அரசு ஐந்தாம் வகுப்பு மற்றும் எட்டாம் வகுப்பு மாணவர்களுக்கு இந்தாண்டு முதல் பொதுத்தேர்வு நடத்தப்படும் என அரசு அறிவித்திருந்தது. இந்த பொதுத் தேர்வை ரத்து செய்யக்கோரி பாமக தமிழ்நாடு தழுவிய போராட்டத்தை அறிவித்திருந்தது. பாமகவின் போராட்ட அறிவிப்பைத் தொடர்ந்து தமிழ்நாடு பள்ளிக் கல்வித்துறை அமைச்சர் செங்கோட்டையன் ராமதாஸை செல்போனில் தொடர்புகொண்டு பேசியதாக தகவல் வெளியாகியது.

இதனைத்தொடர்ந்து பாமக தலைவர் ஜி.கே. மணி சில நாட்களுக்கு முன்பு அறிக்கை ஒன்றை வெளியிட்டிருந்தார். அதில், “செங்கோட்டையன் ராமதாஸை தொடர்புகொண்டு இந்த ஆண்டு தேர்வு தொடங்கிவிட்டது. இந்தச்சூழலில் தேர்வை ரத்து செய்ய முடியாது. அடுத்த ஆண்டு இந்த கோரிக்கை குறித்து பரிசீலிக்கப்படும்” என்று தெரிவித்தாகவும். சூழலைப்புரிந்து கொண்டு பாமக போராட்டத்தை ரத்து செய்தது என்றும் குறிப்பிடப்பட்டிருந்தது.

இந்நிலையில், தமிழ்நாடு பள்ளிக் கல்வித்துறை அமைச்சர் செங்கோட்டையன் இன்று வெளியிட்ட அறிவிப்பில், 5, 8ஆம் வகுப்புகளுக்கு பொதுத்தேர்வு நடத்தப்படாது என்றும் பழைய நடைமுறையே தொடரும் என்றும் தெரிவித்திருந்தார். இது பாமகவிற்கு கிடைத்த வெற்றியென்று கூறி பாமகவின் மாநில துணைப் பொதுச் செயலாளர் வெங்கடேஸ்வரன், முன்னாள் சட்டப்பேரவை உறுப்பினர் வேலுசாமி மற்றும் பாமக தொண்டர்கள் தருமபுரி நகரப் பேருந்து நிலையத்தில் பட்டாசு வெடித்து பொதுமக்களுக்கு இனிப்புகளை வழங்கிக் கொண்டாடினர்.

இதையும் படிங்க:‘இது வெறும் ’இன்டர்வெல்’ தான், ’கிளைமேக்ஸ்’க்கு இன்னும் 12 மாசம் இருக்கு’ - உதயநிதி ஸ்டாலின்