கர்நாடக மாநிலத்தின் காவிரி நீர்ப்பிடிப்புப் பகுதிகளில் தொடர்ந்து கனமழை பெய்துவந்ததால் கர்நாடக அணைகளில் கிருஷ்ணராஜசாகர், கபினி அணைகள் நிரம்பியுள்ளது. இந்த அணைகளிலிருந்து உபரிநீர் முழுவதும் காவிரி ஆற்றில் திறந்துவிடப்பட்டுள்ளது.
கடந்த சில தினங்களாக காவிரி நீர்ப்பிடிப்பு பகுதியில் கனமழை பெய்துவந்ததால், காவிரி ஆற்றில் நீர்வரத்து வினாடிக்கு 40 ஆயிரம் கனஅடி வரை வந்துகொண்டிருந்தது. தற்போது மழையளவு குறைந்ததால், காவிரி ஆற்றின் தமிழ்நாடு எல்லையான பிலிகுண்டுலுவுக்கு கடந்த சில தினங்களாக நீர்வரத்து படிப்படியாகக் குறைந்துவந்தது.
தொடர்ந்து இன்று காலை நிலவரப்படி நீர்வரத்து வினாடிக்கு 8,500 கன அடியிலிருந்து சரிந்து வினாடிக்கு 7,500 கன அடியாக குறைந்துள்ளது. இதனால் 18 நாள்களுக்கு பிறகு சின்னாறு, கோத்திக்கல், மணல்மேடு உள்ளிட்ட இடங்களில் பரிசல் இயக்க மாவட்ட நிர்வாகம் அனுமதியளித்துள்ளது.
மேட்டூர் அணை நிரம்பியுள்ளதால் ஒகேனக்கல் ஐந்தருவி வரை தண்ணீர் தேங்கி நிற்பதால் பொம்மச்சிக்கல், மாமரத்துக்கடவு, ஜவர்பாணி, கர்நாடகா எல்லை உள்ளிட்ட இடங்களில் பரிசல் இயக்க அனுமதி மறுக்கப்பட்டுள்ளது. மேலும் அருவி பகுதியில் உள்ள பாதுகாப்பு அம்சங்கள் பழுதடைந்துள்ளதால் அருவியில் குளிக்க 87ஆவது நாளாக தடைவிதிக்கப்பட்டுள்ளது.
18 நாள்களுக்கு பிறகு பரிசல் இயக்க மாவட்ட நிர்வாகம் அனுமதி வழங்கியதால், சுற்றுலாப் பயணிகள், பரிசல் ஓட்டிகள் மிகுந்த மகிழ்ச்சி அடைந்துள்ளனர். தொடர்ந்து காவிரி ஆற்றங்கரையோரம் வருவாய், ஊரக வளர்ச்சி, காவல் துறையினர் தீவிர பாதுகாப்புப் பணியில் ஈடுபட்டுவருகின்றனர்.
காவிரி நீர்ப்பிடிப்பு பகுதியில் மழை குறைந்ததால், அணைக்கு வரும் நீர்வரத்தும் குறைந்தது. கபினியில் 583 கனஅடியும் கிருஷ்ணராஜசாகர் அணையிலிருந்து 6,141 கனஅடி என இரு அணைகளிலும் மொத்தம் 6,724 கனஅடி தண்ணீர் காவிரி ஆற்றில் திறக்கப்பட்டுள்ளது குறிப்பிடத்தக்கது.
இதையும் படிங்க:40 ஆயிரம் கனஅடி தண்ணீர் ஒகேனக்கல் வருகை!
