தருமபுரி மாவட்டம், பென்னாகரம் சட்டமன்ற தொகுதிக்குட்பட்ட வட்டுவனஹள்ளி ஊராட்சி ஏரிமலை, கோட்டூர்மலை, அலக்கட்டு உள்ளிட்ட மலைக்கிராமங்களில் வசிக்கும் மக்களுக்கு நிவாரண உதவி வழங்குவதற்காக திமுக எம்எல்ஏ இன்பசேகரன் சென்றார். அப்போது ஏரிமலையைச் சேர்ந்த முத்து என்ற பெண் பூச்சிக்கொல்லி மருந்தை உட்கொண்டு ஆபத்தான நிலையில் மயங்கிக் கிடந்துள்ளார்.
அதைக்கண்ட அவரது உறவினர்கள் சாலை வசதி இல்லாத கிராமத்திலிருந்து, மூன்று கிலோ மீட்டர் தூரம் தங்கள் தோள் மீதே தூக்கி வந்துள்ளனர். அப்போது மலைக்கிராம மக்களுக்குத் தன் சொந்த செலவில், அத்தியாவசிய உணவுப் பொருட்களை நிவாரணமாக வழங்குவதற்குச் சென்ற பென்னாகரம் திமுக சட்டப்பேரவை உறுப்பினர் இன்பசேகரன், பூச்சிமருந்து உட்கொண்டு உயிருக்கு ஆபத்தான நிலையிலிருந்த அப்பெண்ணை தனது வாகனத்தில் மருத்துவமனைக்கு அழைத்துச் சென்று, மருத்துவ வசதி கிடைக்க ஏற்பாடு செய்தார்.