தசைச்சிதைவு நோயாளிகளுக்கு பகல் நேர பராமரிப்பு மையம் தொடக்கம்

தருமபுரி: தோக்கம்பட்டியில் தசைச்சிதைவு நோயால் பாதிக்கப்பட்டோருக்கான பகல் நேர பராமரிப்பு மையத்தினை முதலமைச்சர் எடப்பாடி பழனிசாமி காணொலி மூலம் திறந்து வைத்தார்.

சட்டமன்ற பேரவை விதி 110இன் கீழ் தசைச்சிதைவு நோயால் பாதிக்கப்பட்டோருக்கான பகல் நேர பராமரிப்பு மையம் தொடங்குவதற்கு அறிவிப்பு வெளியிடப்பட்டது.

தருமபுரி தோக்கம்பட்டியில் மாற்றுத்திறனாளிகள் நலத்துறையின் சார்பில் ரூ.14 இலட்சம் மதிப்பில் புதியதாக அமைக்கப்பட்டுள்ள தசைச்சிதைவு நோயால் பாதிக்கப்பட்டோருக்கான பகல் நேர பராமரிப்பு மையத்தினை தமிழ்நாடு முதலமைச்சர் எடப்பாடி பழனிசாமி சென்னை தலைமை செயலகத்திலிருந்து காணொலி காட்சியின் வாயிலாக திறந்து வைத்தார்.

இந்நிகழ்வில் மாவட்ட ஆட்சித்தலைவர் கார்த்திகா கலந்து கொண்டு குத்துவிளக்கேற்றி வைத்து மாற்றுத்திறனாளிகளுக்கு இனிப்புகள் வழங்கினார். இம்மையத்தில் தசைச்சிதைவு நோயினால் பாதிக்கப்பட்ட மாற்றுத்திறனாளிகளுக்கு இலவசமாக மருத்துவ உதவி, தசைப்பயிற்சி மற்றும் ஆலோசனைகள் வழங்கப்படவுள்ளது.

இம்மையத்திற்கு ரூ.14.00 இலட்சம் மதிப்பில் உபகரணங்கள் வழங்கப்பட்டுள்ளது. மேலும் தொடர் செலவினங்களுக்கு 2020-21 ஆம் நிதி ஆண்டிற்கு ரூ.12.48 இலட்சம் நிதியுதவி வழங்கப்பட்டுள்ளது.

இம்மையத்தின் மூலம் 25 மாற்றுத்திறனாளிகள் பயனடைய உள்ளனர். மேலும் இத்தொண்டு நிறுவனம் மூலம் பணியமர்த்தப்பட்டுள்ள தசைப்பயிற்சியாளர்கள் பயிற்சிக்கு வர இயலாத மாற்றுத்திறனாளிகளின் வீட்டிற்கு சென்று பயிற்சி அளிக்கவுள்ளனர். இந்நிகழ்வில் அரசு அலுவலர்கள் தன்னார்வலர்கள் பலர் கலந்து கொண்டனர்.

இதையும் படிங்க:எட்டு வழிச்சாலை குறித்து பேசிய முதலமைச்சர் மன்னிப்பு கேட்கக் கூறி விவசாயிகள் ஆர்ப்பாட்டம்!