சென்னை முதல் சேலம் வரையிலான எட்டு வழிச்சாலை திட்டத்தை மத்திய அரசு அறிவித்தது. இந்த திட்டத்திற்கு எதிர்ப்பு தெரிவித்து விவசாயிகள் குடும்பம் குடும்பமாக போராட்டம், கருப்பு கொடி போராட்டம், உடலில் மண்ணெண்ணெய் ஊற்றி தீ குளிக்க முயற்சி என பல்வேறு முறைகளில் போராடி வருகின்றனர்.
இந்த எட்டு வழிச்சாலைத் திட்டத்திற்கு எதிராக நீதிமன்றத்தில் வழக்கு தொடுக்கப்பட்ட போது மத்திய அரசு இந்த திட்டம் வளர்ச்சி திட்டம் என நீதிமன்றத்தில் நியாயப்படுத்தியது. இந்த நிலையில் இந்த திட்டத்தை நிறைவேற்றுவதற்கும், விவசாயிகள் வனப்பகுதி நிலங்களை அரசு ஆக்கிரமிப்பதற்கும் நீதிமன்றம் தடை விதித்து தீர்ப்பு வழங்கியது. இந்த நீதிமன்ற தீர்ப்பு விவசாயிகளுக்கு பெருமகிழ்சியை ஏற்படுத்தியது.
இந்நிலையில், நேற்று அதிமுக கூட்டணி வேட்பாளர்களை ஆதரித்து மத்திய அமைச்சர் நிதின் கட்கரி தேர்தல் பரப்புரை மேற்கொள்ளும் போது, எட்டுவழிச்சாலைத் திட்டம் நல்ல திட்டம். அது விரைவில் விவசாயிகளின் ஆதரவுடன் நிறைவேற்றப்படும் என்று கூறினார்.
இது விவசாயிகளின் மத்தியில் பெரும் அச்சத்தையும், பெரும் கோபத்தையும் ஏற்படுத்தியுள்ளது. அதன் வெளிப்பாடாக எட்டு வழிச்சாலை எதிர்ப்பு இயக்கத்தினர், அவ்வியக்கத்தின் பொருப்பாளர் பழனியப்பன், வேலு, ஆசிரியர் அருள் ஆகியோர் தலைமையில், மத்திய அமைச்சரின் பேச்சுக்கு எதிர்ப்பு தெரிவித்து புதுப்பட்டியில் கருப்பு கொடி ஏந்தி போராட்டம் நடத்தினர்.
இதில் தருமபுரி மாவட்டம் பாப்பிரெட்டிப்பட்டி, கவுண்டம்பட்டி, புதுப்பட்டி, மஞ்சவாடி, பாப்பம்பாடி, பள்ளிப்பட்டி பகுதியைச் சேர்ந்த விவசாயிகளும் பங்கேற்றுக் கண்டன முழக்கங்களை எழுப்பினர்.
