‘யார் முன்னாடி எண்ணுனிங்க? என்ன நினைச்சிட்டு இருக்கீங்க?’ - அலுவலரை வறுத்தெடுத்த திமுக எம்.பி.

தருமபுரி: உள்ளாட்சித் தேர்தல் வாக்கு எண்ணிக்கை அலுவலருடன் திமுக எம்.பி. செந்தில்குமார் வாக்குவாதத்தில் ஈடுபட்ட வீடியோ சமூக வலைதளங்களில் வைரலாகியுள்ளது.

தருமபுரி ஒன்றிய வாக்கு எண்ணிக்கை மையமான தருமபுரி அரசு கலைக்கல்லூரியில் நேற்று வாக்குகள் எண்ணப்பட்டன. இதில், 18ஆவது வார்டில் திமுக சார்பில் ஒன்றிய கவுன்சிலருக்கு போட்டியிட்ட அருள்மொழி என்பவர், 160 வாக்குகள் வித்தியாசத்தில் வெற்றி பெற்றதாகவும், ஆனால் தேர்தல் வாக்கு எண்ணிக்கை அலுவலர்கள் அதிமுக வேட்பாளர் வெற்றி பெற்றதாக அறிவித்ததாகக் கூறி தருமபுரி திமுக எம்.பி. செந்தில்குமார், தருமபுரி எம்.எல்.ஏ தடங்கம் சுப்பிரமணி நேற்று நள்ளிரவு தருமபுரி மாவட்ட ஆட்சியர் அலுவலகத்தின் நுழைவு வாயிலில் தர்ணா போராட்டத்தில் ஈடுபட்டனர்.

பின்னர், அவருடன் பேச்சுவார்த்தை நடத்திய காவல் துறையினர் அவரை வாக்கு எண்ணிக்கை மையம் அலுவலர் ஜெயபாலிடம் அழைத்துச் சென்றனர்.

இதனையடுத்து, தேர்தல் வாக்கு எண்ணிக்கை அலுவலரிடம் மனு கொடுக்கும்போது மறு வாக்கு எண்ணிக்கை நடத்த வேண்டும் என ஆவேசமாக செந்தில்குமார் குரல் எழுப்பினார். மேலும், தபால் வாக்குகள் அங்கீகரிக்கப்பட்ட வேட்பாளர்களின் முகவர்கள் முன்னிலையில் ஏன் எண்ணப்படவில்லை என்றும், என்ன நினைச்சிட்டு இருக்கீங்க எனவும் ஆவேசமாக கேள்வி எழுப்பினார். இந்த வீடியோ தற்போது சமூக வலைதளங்களில் வைரலாகியுள்ளது.

இதையும் படிங்க: வாக்கு எண்ணிக்கையில் முறைகேடு: அதிமுகவினருக்கும் காவலர்களுக்கும் இடையே வாக்குவாதம்