யாரிடமும் சமரசம் செய்துகொள்ள மாட்டோம்: டிடிவி தினகரன்

தருமபுரி: நாடாளுமன்றத் தேர்தலில் அமமுக சார்பில் போட்டியிடும் முன்னாள் அமைச்சர் பழனியப்பனை ஆதரித்து தேர்தல் பரப்புரையில் ஈடுபட்ட தினகரன், நாங்கள் யாரிடமும், எதற்காகவும் சமரசம் செய்து கொள்ள மாட்டோம் என வாக்காளர்கள் முன்னிலையில் பேசியுள்ளார்.

தருமபுரி நாடாளுமன்றத் தொகுதி தேர்தலில் அம்மா மக்கள் முன்னேற்ற கழகத்தின் சார்பில் முன்னாள் அமைச்சர் பழனியப்பன் போட்டியிடுகிறார் . அவருக்கு ஆதரவாக டிடிவி தினகரன் இன்று பாலக்கோடு பகுதியில் தொடங்கி பாப்பாரப்பட்டி, பென்னாகரம், இண்டூர் பகுதிகளில் தேர்தல் பரப்புரை மேற்கொண்டார்.

அதில் பேசிய அவர்;

• என்னை மக்கள் குக்கர் சின்னத்தில் வெற்றி பெற செய்து திமுகவை டெபாசிட் இழக்க செய்தார்கள்.
• இம்முறை அச்சின்னம் வழங்கவில்லை என்றாலும், நீதிமன்றத்திற்கு சென்று ‘பரிசுப் பெட்டி’ சின்னத்தைப் பெற்று வந்துள்ளோம்.
• எந்த ஒரு திட்டத்தையும் கொண்டு வராததால் தான் 2011ஆம் ஆண்டு திமுக ஆட்சி தமிழகத்தில் பறிபோனது.
• நம் ஆட்சியில் ஜிஎஸ்டி வரியால் பாதிக்கப்பட்ட வியாபாரிகள் மறுமலர்ச்சி பெற நடவடிக்கை எடுக்கப்படும்.
• யாரிடமும் சமரசம் செய்து கொள்ளாமல் யாருக்கும் தலைவணங்காமல் அடிபணியாத இயக்கம் அமமுக.
• அனைவரும் எங்கள் மீது நம்பிக்கை வைத்து பரிசுப் பெட்டி சின்னத்தில் வாக்குகளைப் பதிவுசெய்யவும்.

மேலும், என்றும் மக்களுக்கு மட்டும் தான் நாங்கள் தலைவணங்குவோம், வேறு எந்தக் கொம்பனுக்கும் தலை வணங்க மாட்டோம் என்றும் தினகரன் பேசியுள்ளார்.