தருமபுரி கடைவீதி அம்பலத்தாடி தெருவில் வசிக்கும் தனியார் நிறுவன வங்கி ஊழியர் கடந்த சில தினங்களுக்கு முன்பு பெங்களூருவில் இருந்து வீடு திரும்பியுள்ளார். அவருக்கு கரோனா வைரஸ் தொற்று பாதிக்க இருப்பது உறுதியான நிலையில், தருமபுரி அரசு மருத்துவக் கல்லூரி மருத்துவமனையில் சிகிச்சைப் பெற்று வருகிறார். இதையடுத்து வங்கி ஊழியரின் மனைவி, குழந்தை மற்றும் அவரது மாமனார் ஆகியோருக்கு நோய் தொற்று இருப்பது கண்டறியப்பட்டுள்ளது.
இதேபோல் தனியார் மருத்துவமனையில் பணியாற்றி வந்த 26 வயதான பெண் செவிலியர், திருவள்ளூர் மாவட்டத்தில் வேலை செய்து அரூர் பகுதிக்கு திரும்பிய 26 வயது ஆண், கடத்தூர் தாள நத்தம் பகுதியிலிருந்து சத்தீஸ்கர் மாநிலத்துக்கு சென்று திரும்பிய லாரி ஓட்டுநர், கடலூர் சென்று திரும்பிய பாலக்கோடு அடுத்த ஜக்கசமுத்திரம் பகுதியைச் சேர்ந்தவர் உள்ளிட்டோருக்கு கரோனா தொற்று ஏற்பட்டுள்ளது.