தனியாக இருந்த பெண்ணிடம் மர்ம நபர்கள் கைவரிசை!

கடலூர்: தனியாக இருந்த பெண்ணைத் தாக்கிவிட்டு, வீட்டில் இருந்த தங்க நகைகளை மர்ம நபர்கள் கொள்ளையடித்துச் சென்றனர்.

கடலூர் மாவட்டம் மஞ்சக்குப்பம் பகுதியைச் சேர்ந்தவர் பிரவீன் குமார். இவருக்கு திவ்யபாரதி என்ற மனைவியும், ஒரு பெண் குழந்தையும் உள்ளனர். பிரவீன் குமார் தனது வேலை நிமித்தமாக வெளியூருக்குச் சென்று விட்ட நிலையில், திவ்யபாரதி தனது ஒரு வயது குழந்தையுடன் வீட்டில் தனியாக இருந்துள்ளார்.

இதனை நோட்டமிட்ட மர்ம நபர்கள், நேற்றிரவு வீட்டிற்குள் நுழைந்து, தூங்கிக்கொண்டிருந்த திவ்யபாரதியை சரமாரியாகத் தாக்கிவிட்டு, அவர் கழுத்தில் அணிந்திருந்த தங்கச் சங்கிலி, பீரோவில் இருந்த நகைகள் ஆகியவற்றை கொள்ளையடித்துச் சென்றுள்ளனர்.

இந்நிலையில், இன்று காலை திவ்யபாரதியின் தாய் அமுதா வீட்டிற்கு வந்து பார்த்தபோது, அவரது மகள் மயங்கிய நிலையில் கிடப்பதைக் கண்டு அதிர்ச்சியடைந்துள்ளார். பின்னர் அக்கம் பக்கத்தினர் உதவியோடு திவ்ய பாரதியை மீட்டு கடலூர் அரசு மருத்துவமனையில் சிகிச்சைக்காக அனுமதித்தார்.

இதனைத் தொடர்ந்து, இச்சம்பவம் தொடர்பாக புதுநகர் காவல் துறையினர் வழக்குப்பதிவு செய்து விசாரணை நடத்தி வருகின்றனர்.