குழந்தை திருமணம் தொடர்பாக சேலத்தில் தலைமறைவாக இருந்த இரு தீட்சிதர்கள் கைது

கடலூர் மாவட்டம் சிதம்பரத்தில் 14 வயது சிறுமியை திருமணம் செய்த பசுபதி தீட்சிதர் மற்றும் அவரது தந்தையை காவல்துறையினர் கைது செய்தனர்.

கடலூர்: சிதம்பரம் வடக்கு வீதியை சேர்ந்த தீட்சிதர் சோமசேகர். இவரின் 14 வயது மகள் தற்போது 10-ம் வகுப்பு படித்து வரும் மாணவியை கடந்த ஆண்டு , அதே பகுதியை சேர்ந்த பசுபதி என்ற 24 வயது தீட்சிதருக்கு திருமணம் செய்து வைத்துள்ளனர். இதுதொடர்பான புகாரின் பேரில் வழக்குப்பதிவு செய்து கடலூர் மகளிர் காவல் நிலைய போலீசார், சிறுமியின் தந்தை சோமசேகர் தீட்சிதரை (46) நேற்று கைது செய்தனர்.

மேலும் திருமணம் செய்த மாப்பிள்ளை மற்றும் அவரது குடும்பத்தினர் தலைமறைவாகிவிட்ட நிலையில், காவல்துறையினர் அவர்களை தேடி வந்தனர். இருவரும் சேலத்தில் இருப்பதாக கடலூர் டெல்டா பிரிவு காவல்துறையினருக்கு தகவல் கிடைத்தது.

அதன்படி இன்று காலை சேலம் சென்ற டெல்டா பிரிவு காவல்துறையினர் பசுபதி தீட்சிதர் மற்றும் அவரது தந்தை கணபதி தீட்சிதர் இரண்டு பேரையும் கைது செய்தனர். அதனை தொடர்ந்து தற்பொழுது இவர்கள் இரண்டு பேரும் கடலூர் அனைத்து மகளிர் காவல் நிலையத்தில் ஒப்படைக்கப்பட்ட நிலையில், அவர்களிடம் போலீசார் விசாரணை நடத்தி வருகின்றனர்.

இதையும் படிங்க:வரதட்சணை கொடுமை வழக்கில் 15 ஆண்டுகளாக தலைமறைவாக இருந்தவர் கைது