‘சமூகநீதிக்கு ஆபத்து என்றால் அதற்கு எதிர்குரல் கொடுப்பது அதிமுக மட்டுமே’ - முதலமைச்சர் பழனிசாமி பெருமிதம்

கடலூர்: சமூகநீதிக்கு ஆபத்து வரும்போதெல்லாம் அதற்கு எதிராகக் குரல் கொடுத்த ஒரே இயக்கம் அதிமுகதான் என்று முதலமைச்சர் எடப்பாடி பழனிசாமி பெருமிதம் தெரிவித்துள்ளார்.

முன்னாள் அமைச்சர் எஸ்.எஸ். ராமசாமி படையாட்சியாரின் செயல்பாடுகளைப் போற்றும் விதமாக, தமிழ்நாடு அரசு சார்பில் கடலூர் மஞ்சக்குப்பத்தில் ரூ.2.15 கோடி செலவில் நினைவு மண்டபம் அமைக்கப்பட்டுள்ளது. இதனை முதலமைச்சர் எடப்பாடி பழனிசாமி நேற்று திறந்து வைத்தார். அவருடன் துணை முதலமைச்சர் ஓ. பன்னீர்செல்வம், அமைச்சர்கள், அரசு அலுவலர்கள், பாமக தலைவர் ஜி.கே. மணி உள்ளிட்டோர் கலந்துகொண்டனர்.

இந்நிகழ்ச்சியில் பேசிய முதலமைச்சர் பழனிசாமி, ”1980ஆம் ஆண்டில் பிற்படுத்தப்பட்டோருக்கான இடஒதுக்கீட்டினை 31 சதவீதத்திலிருந்து 50 சதவீதமாக எம்ஜிஆர் உயர்த்தினார். பட்டியலினத்தவர்களுக்கும் பழங்குடியினருக்கும் சேர்த்து தமிழ்நாட்டில் 69 சதவீத இடஒதுக்கீடு உள்ளது. இதனை நிலைபெறச் செய்து சமூகநீதி காத்தவர் முன்னாள் முதலமைச்சர் ஜெயலலிதா. 1993ஆம் ஆண்டில் சட்டம் இயற்றி அரசியலமைப்பு சட்டம் 9ஆவது அட்டவணையில் சேர்த்து அரசியலமைப்பு பாதுகாப்பு பெற்றுத் தந்தவர் ஜெயலலிதா.

சமூகநீதிக்கு ஆபத்து நேரும்போதெல்லாம் அதற்கு எதிர்ப்புக் குரல் கொடுத்து அதனைக் களையும் அரசு அதிமுகதான். வாக்குறுதியை நிறைவேற்றும் அரசாக அதிமுக உள்ளது. எம்ஜிஆர், ஜெயலலிதா வழியில் வந்த இந்த ஆட்சி பிற்படுத்தப்பட்ட, மிகவும் பிற்படுத்தப்பட்ட மக்களுக்கு எண்ணற்ற திட்டங்களை வழங்கி வருகிறது.

பாமக நிறுவனர் ராமதாஸ், சட்டத் துறை அமைச்சர் சி.வி. சண்முகம் ஆகியோர் என்னை சந்தித்து சில கோரிக்கைகளை வைத்துள்ளனர். அது தற்போது அரசின் பரிசீலனையில் இருக்கிறது. இந்த அரசு இச்சமுதாயத்திற்கு எண்ணற்ற திட்டங்களைச் செய்யும் என்று உறுதி கூறுகிறேன்” என்றார்.

இதையும் படிங்க:ராமசாமி படையாட்சியார் உருவப் படம் திறப்பு!