நீலகிரி: கூடலூர், மசினக்குடி பகுதிகளில் நான்கு மனிதர்களையும், 30க்கும் மேற்பட்ட கால்நடைகளையும் அடித்துக்கொன்ற புலியை சுட்டுப் பிடிக்க உத்தரவிடப்பட்ட நிலையில், அதிரடிப் படையினர், வனத்துறையினர் நேற்று தேடுதல் வேட்டையில் ஈடுபட்டனர்.
8 மணி நேரமாக நடைபெற்ற இந்தத் தேடுதல் வேட்டை தோல்வியடைந்தது. புலி தொடர்ந்து இடம்பெயர்ந்து, வனத்துறையினரிடம் சிக்காமல் போக்கு காட்டி வருகிறது.
இதனையடுத்து ஒன்பதாவது நாளாக இன்றும் புலியை தேடும் பணி தொடர்ந்து நடைபெறுகிறது.
4 எலைட் படையினர் வருகை
இரண்டு மருத்துவக் குழுவினர், 50க்கும் மேற்பட்ட வன ஊழியர்கள் சிங்காரா பகுதியில் T23 புலியை தேடி வருகின்றனர். முதன்முறையாக மோப்ப நாயின் உதவியுடன் புலியின் இருப்பிடத்தைக் கண்டறியும் பணியில் வனத்துறை ஈடுபட்டுள்ளது. மேலும் கோவையிலிருந்து புலியைப் பிடிக்க தனிப்பயிற்சி பெற்ற நான்கு எலைட் படையினர் முதுமலை வந்துள்ளனர்.