கரோனா வேடமிட்டு காவல் துறையினர் விழிப்புணர்வு

கடலூர் : காவல் துறை சார்பில் கரோனா வேடமிட்டு விழிப்புணர்வு ஏற்படுத்தியது அப்பகுதி மக்களிடையே மிகுந்த வரவேற்பை பெற்றுள்ளது.

சீனாவில் உருவான கரோனா வைரஸ் தொற்று உலக நாடுகளை அச்சுறுத்திவருகிறது. இந்த வைரஸ் இந்தியாவையும் விட்டுவைக்கவில்லை. இந்தியாவில் இதுவரை ஆறாயிரத்திற்கும் அதிகமானோர் கரோனா வைரஸ் தொற்றால் பாதிக்கப்பட்டுள்ளனர். இதனால் வைரஸ் பரவலைக் கட்டுப்படுத்தும் விதமாக நாடு முழுவதும் ஊரடங்கு உத்தரவு அமலில் உள்ளது.

இந்நிலையில் மாவட்ட நிர்வாகம் சார்பில் பல்வேறு விழிப்புணர்வுகளும் தடுப்பு நடவடிக்கைகளும் மேற்கொள்ளப்பட்டு வருகின்றன. அத்தியாவசிய பொருட்களை வாங்கும் கடைகளைத் தவிர மற்ற அனைத்தும் மூடப்பட்டுள்ளன.

இந்நிலையில் கடலூரில் முக்கிய பகுதிகளில் சமூக விலகலை கடைப்பிடிக்கவேண்டும், கிருமி நாசினி கொண்டு கைகளை கழுவ வேண்டும், முகக்கவசம் அணிய வேண்டும் என பொதுமக்களிடையே காவல் துறையினர், கரோனா வேடமிட்டு விழிப்புணர்வை ஏற்படுத்தினர்.