பேருந்தில் பயணம் செய்த தம்பதிக்கு கரோனா: அலறி அடித்து ஓடிய பயணிகள்

கடலூர்: நெய்வேலி அருகே பேருந்தில் பயணம் செய்துகொண்டிருந்த தம்பதிக்கு கரோனா தொற்று உறுதி என தகவல் வந்ததையடுத்து, பேருந்தின் சக பயணிகள் அலறியடித்து ஓட்டம் பிடித்துள்ளனர்.

கடலூர் மாவட்டம் வடலூர் பகுதியைச் சேர்ந்த கணவன், மனைவி இருவரும் வெளியூர் சென்று ஊர் திரும்பியுள்ளனர். இதனால் மாவட்ட நிர்வாகம் சார்பில் அவர்களுக்கு கரோனா பரிசோதனை செய்யப்பட்டது. இந்த பரிசோதனையின் முடிவானது நேற்றைய தினம் தெரியவந்தது.

அப்போது கணவன், மனைவி இருவரும் தங்களின் சொந்த வேலையாக பண்ருட்டி அருகே உள்ள காடாம்புலியூர் சென்றுவிட்டு, மீண்டும் அரசுப் பேருந்தில் வடலூர் நோக்கி சென்றுள்ளனர். அப்போது, சுகாதாரத் துறையினர் அத்தம்பதியினரை செல்ஃபோனில் தொடர்புகொண்டு, அவர்களுக்கு கரோனா தொற்று உறுதி செய்யப்பட்டுள்ளதாகவும், உடனடியாக மருத்துவமனைக்குச் செல்லும்படியும் கூறி உள்ளனர்.

இதற்கு தம்பதியினர் தாங்கள் அரசுப் பேருந்தில் வடலூர் நோக்கி சென்று கொண்டிருப்பதைக் கூறியுள்ளனர். இதனைத் தொடர்ந்து சுகாதாரத் துறையினர் அப்பேருந்து ஓட்டுநரைத் தொடர்புகொண்டு, தம்பதியினருக்கு கரோனா தொற்று உறுதியாகியுள்ள செய்தியைத் தெரிவித்தனர்.

இதனையறிந்த ஓட்டுநர், பேருந்தை சாலையோரத்தில் நிறுத்திவிட்டு அலறியடித்து ஓட்டம் பிடித்துள்ளார். பின்னர், நடத்துநர், சக பயணிகள் என அனைவரும் அலறி அடித்து ஓட்டம் பிடித்தனர்.

பாதிக்கப்பட்ட தம்பதிகள் மட்டும் பேருந்தில் அமர்த்திருந்துள்ளனர். அதன்பின், சுகாதாரத் துறையினர் தம்பதியை ஆம்புலன்ஸ் வாகனம் மூலம் கடலூர் அரசு மருத்துவமனைக்கு அழைத்துச் சென்றுள்ளனர்.

அதன் பின்னர், அவர்கள் பயணித்த அரசுப் பேருந்தானது வடலூர் பணிமனைக்கு எடுத்துச் செல்லப்பட்டு, கிருமிநாசினி தெளிக்கப்பட்டு சுத்தம் செய்யப்பட்டுள்ளது. இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

இதையும் படிங்க:இன்றுமுதல் சென்னை-மதுரை விமான போக்குவரத்து ரத்து!