கணவரை கொலை செய்ய முயற்சி- மனைவி உள்பட 6 பேர் கைது

கோயம்புத்தூரில் தனது திருமணத்தை மீறிய உறவுக்கு இடையூறாக இருந்த தனது கணவரை கொலை செய்ய முயன்ற மனைவி உள்பட ஆறு பேரை காவல் துறையினர் கைது செய்தனர்.

கோயம்புத்தூர்: ஒண்டிபுதூரைச் சேர்ந்தவர் சேதுராஜாராம் சிங் (29). இவரது மனைவி இ.எஸ்.ஐ மருத்துவமனையில் தூய்மை பணியாளராக பணியாற்றுகிறார். கடந்த ஆறு ஆண்டுகளுக்கு காதல் திருமணம் செய்துகொண்ட இவர்களுக்கு இரண்டு குழந்தைகள் உள்ளனர்.

கடந்த இரு மாதங்களாக சேதுவின் மனைவிக்கும், நீலிகோணாம் பாளையத்தைச் சேர்ந்த குணசேகரன் (23)(இ.எஸ்.ஐ மருத்துவமனை ஆம்புலன்ஸ் ஓட்டுநர்) என்பவருக்கும் திருமணத்தை மீறிய உறவு ஏற்பட்டது. இதற்கு இடையூறாக இருக்கும் கணவரை கொலை செய்ய, சேதுவின் மனைவியும், குணசேகரனும் திட்டமிட்டனர்.

கணவரை தாக்கிய மனைவி

இந்நிலையில், ஜூலை 25ஆம் தேதி இரவு அந்தப் பெண், குணசேகரன் அவரது நண்பர்கள் மூர்த்தி (17), அன்பு (16), மதன்குமார் (18), ஆகாஷ் (17) ஆகியோர் இணைந்து வீட்டின் முன்பு நின்று கொண்டிருந்த சேதுராஜாராமை கத்தியால் தாக்கினர். அப்போது, அவர் சத்திமிடவே அக்கம்பக்கத்தினர் வந்ததால அப்பெண்ணை தவிர்த்து அனைவரும் தப்பி ஓடினர்.

கணவர்

பின்னர் சேது மருத்துவமனையில் அனுமதிக்கப்பட்டார். இது குறித்து காவல் துறையினருக்கு மருத்துவ நிர்வாகம் தகவல் தெரிவித்த நிலையில் மருத்துவமனைக்கு வந்த சிங்காநல்லூர் காவல் துறையினர் சேதுவின் மனைவியிடம் விசாரணை நடத்தினர்.

விசாரணையில் அம்பலமான உண்மை

விசாரணையில், அடையாளம் தெரியாத நபர்கள் சிலர் தாக்கியதாக தெரிவித்தார். இதனைத் தொடர்ந்து சிகிச்சையில் மயக்கம் தெளிந்த சேதுவிடம் விசாரணை மேற்கொண்டதில், தன்னுடைய மனைவியும், குணசேகரனும் சேர்ந்துதான் கொலை செய்ய முயன்றதாக தெரிவித்தார்.

இதனையடுத்து விசாரணை நடந்ததில் கணவரை கொலை செய்ய திட்டமிட்டதை அப்பெண் ஒத்துக்கொண்டார். அதனடிப்படையில் அவர் உள்பட 6 பேரை காவல் துறையினர் கைது செய்து சிறையில் அடைத்தனர்.

இதையும் படிங்க: கூலித் தொழிலாளி வெட்டிக் கொலை-குற்றவாளிக்கு வலை