கோயம்புத்தூர்: கோவை மாவட்டம் வால்பாறை சுற்றுவட்டாரப் பகுதிகளில் தற்போது காட்டு யானைகள் கூட்டமாகவும் தனித்தனியாகவும் தொழிலாளர்கள் பணிசெய்யும் தேயிலைத் தோட்டம் மற்றும் மக்கள் குடியிருப்பு பகுதிகளில் ஆங்காங்கே உலாவருவது வாடிக்கையாகிவிட்டது.
இந்த நிலையில் சில நேரங்களில் மக்கள் குடியிருப்புப் பகுதிகளில் நுழைந்து சேதங்களை ஏற்படுத்தி வருகிறது. இதற்கிடையில் இன்று வால்பாறை அருகே உள்ள தோணிமுடி மற்றும் முத்துமுடி பகுதியில் உள்ள தேயிலைத் தோட்டத்தில் சுமார் 40க்கும் மேற்பட்ட காட்டுயானைகள் கூட்டம் கூட்டமாக முகாமிட்டுள்ளது.
இந்தக் காட்டுயானைகள் நேற்று இரவு முதலே ஒன்றுகூடி முகாமிட்டுள்ளதாக தகவல் வந்ததை அடுத்து ஆனைமலை புலிகள் காப்பக துணை கள இயக்குனர் கணேசன் உத்தரவின் பேரில் மானாம்பள்ளி வனச்சரக அலுவலர் மணிகண்டன் தலைமையில் வனத்துறையினர் மற்றும் என்.சி.எப்.பணியாளர்கள் அனைவரும் ஒன்றுசேர்ந்து காட்டுயானைகளை அருகே உள்ள கேரள மாநிலத்திற்கு உள்பட்ட வாகுபாறை வனப்பகுதிக்கு விரட்டும் பணியைத் தீவிரப்படுத்தி வருகின்றனர்.
வால்பாறையில் காட்டு யானைகள் முகாம் மேலும், பல்வேறு பகுதிகளில் சேதங்களை ஏற்படுத்தியுள்ள காட்டு யானைகள் கூட்டம் தற்போது ஒட்டுமொத்தமாகக் கூடி இருப்பதால் அப்பகுதி பொது மக்கள் பெரும் அச்சத்தில் உள்ளனர்.
இதையும் படிங்க:கோவை: ரயில்மோதி உயிரிழந்த யானை கருவுற்றிருந்தது உடற்கூராய்வில் கண்டுபிடிப்பு
