காவல் துறையினர் முன்பே இரு சக்கர வாகனத்தைத் திருடிய பலே கில்லாடி!

கோவை : காவல் துறையினரின் எதிரே இருசக்கர வாகனத்தை அடையாளம் தெரியாத நபர் ஒருவர் திருடிச்செல்லும் சிசிடிவி காட்சி வெளியாகி அதிர்ச்சியை ஏற்படுத்தியுள்ளது.

கோவை, சுக்கரவார்பேட்டை பகுதியைச் சேர்ந்தவர் சஞ்சய். தனியார் நிறுவனத்தில் பணிபுரிந்து வருகிறார். தனது விலை உயர்ந்த பல்சர் இரு சக்கர வாகனத்தை தனது வீட்டின் முன்பு இவர் வழக்கமாக நிறுத்தி வந்துள்ளார்.

இந்நிலையில் நேற்று (செப்.16) அதிகாலை வீட்டின் முன்பு நிறுத்தப்பட்டிருந்த இரு சக்கர வாகனம் காணாமல் போயுள்ளது. இதனையடுத்து அப்பகுதியில் உள்ள கண்காணிப்புக் காமிராவை ஆய்வு செய்தபோது, அடையாளம் தெரியாத நபர் ஒருவர் இருசக்கர வாகனத்தை திருடிச்செல்லும் காட்சி சிசிடிவியில் பதிவாகியிருந்தது.

அதில் இரு சக்கர வாகனத்தைத் திருடும் நபர், வாகனத்திற்கு அருகில் அமர்ந்து வயர்களை துண்டித்துவிட்டு, பின்னர் சாலையில் வாகனங்கள் வரும்போது எழுந்து சென்று இருட்டில் மறைத்து கொள்கிறார்.

தொடர்ந்து, இரு சக்கர வாகனத்தை யாருக்கும் தெரியாமல் எடுத்து செல்லும்போது, எதிரே காவல் துறையின் ரோந்து வாகனமும் வருகிறது. இவை அனைத்தும் சிசிடிவியில் தெளிவாகப் பதிவாகியுள்ளது. மேலும், ரோந்து வாகனம் அதே பகுதியில் நீண்ட நேரம் நிற்கும் காட்சியும் அதில் பதிவாகியுள்ளது.

இந்நிலையில் தற்போது ஆர்.எஸ்.புரம் காவல் துறையினர் இச்சம்பவம் குறித்து வழக்குப் பதிவு செய்து விசாரணை மேற்கொண்டு வருகின்றனர்.

இதையும் படிங்க: 675 கிலோ கஞ்சாவை பறிமுதல் செய்து ஆந்திர போலீஸ் அதிரடி!