கோவை, திருப்பூர் மாவட்டங்களில் 2 இலட்சத்திற்கும் மேற்பட்ட விசைத்தறி கூடங்கள் இயங்கி வருகின்றது. இந்த தொழிலை நம்பி சுமார் 3 லட்சம் தொழிலாளர்கள் நேரடியாகவும், மறைமுகமாகவும் பணியாற்றி வருகின்றனர். விசைத்தறி உரிமையாளர்கள் ஜவுளி உற்பத்தியாளர்களிடம் இருந்து நூலினை பெற்று, காடா துணியாக நெய்து கொடுக்கின்றனர். இவர்களுக்கு துணியின் ரகத்திற்கு ஏற்ப ஜவுளி உற்பத்தியாளர்கள் கூலி தருவது வழக்கம்.
இந்நிலையில் கூலி வழங்குவதில் விசைத்தறி உரிமையாளர்களுக்கும், ஜவுளி உற்பத்தியாளர்களுக்கும் முரண்பாடு ஏற்பட்டதையடுத்து, கடந்த 2014ஆம் ஆண்டு ஜவுளி உற்பத்தியாளர்களுக்கும், கூலிக்கு நெசவு செய்யும் விசைத்தறி உரிமையாளர்களுக்கும் இடையே கூலி ஒப்பந்தம் போடப்பட்டது.
ஆனால் இந்த ஒப்பந்தம் போடப்பட்டு 5 ஆண்டுகளாகியும், ஜவுளி உற்பத்தியாளர்கள் ஒப்பந்தம்படி கூலி வழங்காமல் குறைத்து வழங்கி வந்தனர். இந்நிலையில் தற்போது அதற்கும் குறைவான கூலியை ஜவுளி உரிமையாளர்கள் வழங்கி வருவதாக கூலிக்கு நெசவு தொழிலில் செய்யும் விசைத்தறி உரிமையாளர்கள் குற்றம் சாட்டியுள்ளனர். மேலும் அரசுக்கு இதுகுறித்து பலமுறை கோரிக்கை வைத்தும் அரசு சார்பில் எந்தவித நடவடிக்கையும் எடுக்கவில்லை.
வேலைக்கு தகுந்த கூலி இல்லை - விசைத்தறி உரிமையாளர்கள் குற்றச்சாட்டு இதுகுறித்து மாவட்ட விசைத்தறி உரிமையாளர்கள் சங்க தலைவர் பழனிசாமி கூறுகையில், "தொழில் முடக்கம் ஏற்பட்டால் உற்பத்தி குறைப்பு செய்வதற்கு பதிலாக, ஜவுளி உற்பத்தியாளர்கள் கூலி குறைப்பு செய்திருப்பதை ஏற்க முடியாது. இந்த பிரச்னைக்கு தீர்வு காணவில்லை என்றால் போராட்டத்தில் ஈடுபடுவோம்" என்றார்.
