"ஆதீனங்கள் சொல்வதை தமிழக அரசு கவனத்தில் கொள்ள வேண்டும்" - ஆளுநர் தமிழிசை சௌந்தரராஜன்

Tamilisai Soundararajan: ஆதீனங்கள் காலம் காலமாக தமிழோடு ஆன்மீகத்தை வளர்த்தவர்கள் என்று ஆளுநர் தமிழிசை சௌந்தரராஜன் தெரிவித்துள்ளார்.

கோயம்புத்தூர்: பல்வேறு நிகழ்ச்சிகளில் கலந்து கொள்வதற்காக கோவை வந்த தெலங்கானா ஆளுநரும், புதுச்சேரி துணை நிலைய ஆளுநருமான தமிழிசை சௌந்தரராஜன், கோயம்புத்தூர் விமான நிலையத்தில் செய்தியாளர்களைச் சந்தித்தார். அப்போது அவர் பேசியதாவது, "ஆயுத பூஜை, சரஸ்வதி பூஜைக்கு மதம் சார்ந்த படங்கள் வைக்கக்கூடாது எனவும், ஒருவேளை வைத்திருந்தால் எடுக்க வேண்டும் எனவும் திருப்பூர் மருத்துவக் கல்லூரியின் முதல்வர் கூறியுள்ளார். படங்களை எடுத்தால்தான் பிரச்னை வரும்.

தற்போது அரசு அதிகாரிகள் எல்லாம் இப்படி பேசினால்தான் இந்த அரசுக்குப் பிடிக்கும் என பேச ஆரம்பித்துள்ளனர். இது வன்மையாகக் கண்டிக்கத்தக்கது. ஒட்டுமொத்தமாக மதம் சார்ந்த உணர்வுகளை ஒதுக்குவது என்பது ஏற்றுக் கொள்ள முடியாத ஒன்று. தமிழக அரசு இதற்கு சரியான விளக்கம் அளிக்க வேண்டும்.

லியோ திரைப்பட விவகாரம் பெரிதாகி வருகிறது. பொதுவாக, எந்த நடிகர்கள் நடித்தாலும் தயாரிப்பு நிறுவனங்கள் தயாரித்திருந்தாலும், ஒரே மாதிரியான நடைமுறைகள் கடைபிடிக்கப்பட வேண்டும். புதுச்சேரியில் ஆட்சியர் 7 மணிக்கு அனுமதி அளித்த பின்பும், சில அழுத்தம் காரணமாக ஒன்பது மணிக்குதான் திரையிட முடிந்தது. இந்த அழுத்தம் தூய தமிழில் 'ரெட் ஜெயன்ட்' என்னும் பெயர் வைத்து நடத்தும் நிறுவனத்தால்தான் பிரச்னை என நிர்வாகத்தினர் கூறுகின்றனர்.

விளையாட்டை விளையாட்டாகப் பார்க்க வேண்டும் என கூறுகின்றனர். அப்படியென்றால், சினிமாவை சினிமாவாகத்தானே பார்க்க வேண்டும். ஆகவே சுதந்திரமான ஒரு சூழ்நிலை நிலவ வேண்டும்" என்று கூறினார்.

தொடர்ச்சியாக ஜெய் ஸ்ரீ ராம் முழக்கம் குறித்த கேள்விக்குப் பதில் அளித்த அவர், "ஜெய் ஸ்ரீ ராம் எனக் கூறியதால் மற்ற மதத்தைச் சார்ந்தவர்கள், அவர்களது மதத்தின் கடவுளின் பெயரைக் கூற வேண்டாம் என கூறவில்லை. வெற்றியின் வெளிப்பாடாக உற்சாகத்தோடு இறைவன்தான் அந்த வெற்றியைக் கொடுத்தார் என்பதைச் சொல்லும்போது தப்பில்லை. மற்ற மதத்தவர்கள் சொல்லும்போது அவர்களது நம்பிக்கைகளையும் குறை சொல்ல முடியாது. எனவே அதை தப்பு என கூற முடியாது" என்று தெரிவித்தார்.

மதமாற்றம் குறித்து ஆதீனங்கள் குற்றச்சாட்டு குறித்த கேள்விக்கு, "ஆதீனங்கள் காலம் காலமாக தமிழோடு ஆன்மீகத்தை வளர்த்தவர்கள். அவர்கள் ஒன்று சொன்னால், தமிழக அரசு அதை நிச்சயமாக தனது கவனத்தில் எடுத்துக் கொள்ள வேண்டும். மற்ற மதங்களின் பிரச்னைகளைச் சொல்லும்போது அரசாங்கம் உடனடியாக கவனத்தைச் செலுத்துகிறது.

ஆனால் இந்து மதம் சார்ந்த எந்த ஒரு பிரச்னைகளுக்கும் கவனம் கொடுப்பதில்லை. ஆகவே, ஆதீனங்கள் சொல்கிறார்கள் என்றால், அதில் உண்மை இருக்கிறதா என்பதைப் பார்க்க வேண்டும் என்பது என்னுடைய வேண்டுகோள்" என்று பதில் அளித்தார்.

இதையும் படிங்க:Leo Release: கட்டுப்பாடுகளால் களையிழந்த ரோகிணி திரையரங்கம்!