அரசுக்கு எதிராக அவதூறு பரப்பியதாக ஊடக உரிமையாளர் கைது!

கோயம்புத்தூர்: கரோனா தடுப்பு நடவடிக்கை தொடர்பாக அரசுக்கு எதிராக அவதூறு பரப்பியதாக ஆன்லைன் செய்தி ஊடக உரிமையாளரை காவல் துறையினர் கைது செய்துள்ளனர்.

கோவையில் செயல்பட்டு வரும் ஆன்லைன் செய்தி ஊடகம் கரோனா தொற்று தொடர்பாக அரசு எடுத்து வரும் நடவடிக்கைகள் குறித்தும், ஊரடங்கு உத்தரவால் பொதுமக்களுக்கு வழங்கப்படும் நிவாரணம் சரியாகச் சென்றடையவில்லை என திமுக எம்எல்ஏ கொடுத்த அறிக்கையைச் செய்தியாகவும் வெளியிட்டுள்ளது. இதுதவிர கோவை மருத்துவ மாணவர்களுக்கு உணவு சரியாக வழங்கப்படவில்லை என்று புகாரையும் அந்த ஊடகம் செய்தியாக வெளியிட்டது.

இந்நிலையில் அந்த ஊடகம் தவறான செய்திகள் வெளியிட்டுள்ளதாகக் கூறி கோவை மாநகராட்சி உதவி ஆணையர் சுந்தர்ராஜன் ஆர்.எஸ்.புரம் காவல் நிலையத்தில் புகார் அளித்தார். புகாரின்பேரில் அந்த ஊடகத்தின் செய்தியாளர் ஒருவரையும் புகைப்படக் கலைஞர் ஒருவரையும் காவல் துறையினர் விசாரணைக்காக அழைத்துச் சென்றனர்.

விசாரணைக்கு அழைத்துச் செல்லப்பட்ட இருவரையும் இரவு வரை காவல் நிலையத்தில் பிணைக் கைதிகளாக வைக்கப்பட்டுள்ளதாகக் கூறி கோவையில் உள்ள அனைத்து ஊடகத் துறை செய்தியாளர்களும் காவல் நிலையம் முன்பு ஒன்றுகூடியதால் சிறிதுநேரம் அங்கு பரபரப்பு நிலவியது.

விசாரணைக்கு அழைத்துச் செல்லப்பட்ட செய்தியாளர், புகைப்படக் கலைஞர்

இதையடுத்து அவர்கள் இருவரையும் காவல் துறையினர் விடுவித்தனர். பின்னர் அந்த ஊடகத்தின் உரிமையாளர் மீது தொற்று நோய் தடுப்புச் சட்டத்தின் கீழ் அவதூறு ஏற்படுத்துதல், தவறான செய்திகளைப் பரப்புதல் உள்ளிட்ட மூன்று பிரிவுகளில் வழக்குப்பதிவு செய்து, அவரைக் கைதுசெய்னர்.