பழங்குடி இன மாணவர்களுக்கு சாதி சான்றிதழ் வழங்கக் கோரி ஆட்சியரிம் மனு!

கோவை: பழங்குடி இன மாணவர்களுக்கு சாதி சான்றிதழ் வழங்கக் கோரி இந்திய மாணவர்கள் சங்கம் சார்பில் மாவட்ட ஆட்சியரிடம் மனு அளிக்கப்பட்டது.

இந்திய மாணவர்கள் சங்கத்தின் சார்பில் பழங்குடி இன மாணவர்களுக்கும் அவர்களின் பெற்றோர்களுக்கும் சாதி சான்றிதழ் வழங்கிட கோரி கோவை மாவட்ட ஆட்சியர் அலுவலகத்தில் மனு அளிக்கப்பட்டது. அந்த மனுவில்,"இந்திய மாணவர்கள் சங்க கோவை மாவட்டத்தின் சார்பில் பழங்குடி இன மாணவர்களின் கல்வி நிலை குறித்து கடந்த நான்கு மாதங்களுக்கு மேலாக மலைவாழ் கிராமங்களில் தொடர் ஆய்வு செய்து வருகிறோம்.

மலைக் கிராமங்களில் வசிக்கும் பெரும்பாலான பழங்குடி இன மாணவர்களுக்கும், பெற்றோர்களுக்கும் சாதி சான்றிதழ் இல்லை. இதனால், அரசு உடனடியாக அவர்களுக்கு சான்றிதழ் கிடைக்க நடவடிக்கை எடுக்க வேண்டும்" என்று குறிப்பிடப்பட்டுள்ளது.

இது குறித்து இந்திய மாணவர் சங்கத்தின் கோவை மாவட்ட செயலாளர் தினேஷ் ராஜா கூறுகையில்,"கடந்த நான்கு மாதங்களுக்கும் மேலாக இந்திய மாணவர் சங்கத்தின் சார்பாக ஆனைமலை போன்ற இடங்களில் மாணவர்களின் கல்வி நிலை குறித்து ஆய்வு செய்தோம். அதில், பெரும்பாலான மலைவாழ் கிராம பழங்குடி இன மாணவர்களுக்கு சாதி சான்றிதழ்கள் இல்லை.

இதன் காரணமாக, அரசு வழங்கக்கூடிய சில சலுகைகள் அவர்களுக்களைச் சென்றடைவதில்லை. எனவே மாவட்ட ஆட்சியர் உடனடியாக நடவடிக்கை எடுத்து அனைத்து மாணவர்களுக்கும் சாதி சான்றிதழ் வழங்க வேண்டும்" என்றார்.

இதையும் படிங்க:சாதி சான்றிதழ் வேண்டி மலைவாழ் மக்கள் போராட்டம் !