தனியார் ஆலையில் 510 கிலோ ரேஷன் அரிசி பறிமுதல் - ஆலைக்குச் சீல் வைப்பு!

கோவை: சட்டவிரோதமாக பதுக்கிவைக்கப்பட்டிருந்த 510 கிலோ ரேசன் அரிசி, 210 கிலோ அரிசி மாவை பறிமுதல் செய்த வருவாய்த்துறையினர் அரவை ஆலைக்கு சீல் வைத்தனர்.

கோவை செல்வபுரம் பகுதி சோழன் நகரில் தனியாருக்குச் சொந்தமான அரவை ஆலை இயங்கி வருகிறது. இந்த அரவை ஆலையில் சட்டத்திற்குப் புறம்பாக ரேஷன் அரிசியை பதுக்கி மாவாக அரைத்து விற்கப்படுவதாக மாவட்ட ஆட்சியருக்கு ரகசிய தகவல் கிடைத்தது. இதனைத் தொடர்ந்து மாவட்ட ஆட்சியர் ராசாமணி உத்தரவின் பேரில், செல்வபுரம் பகுதிக்குச் சென்ற மாவட்ட வழங்கல் அலுவலர் குமரேசன், தனி வட்டாட்சியர் சிவக்குமார் தலைமையில் பறக்கும் படையினர் ஆலையில் ஆய்வு மேற்கொண்டனர்.

அப்போது ஆலையில் 510 கிலோ ரேஷன் அரிசி, 210 கிலோ அரிசி மாவு பதுக்கி வைக்கப்பட்டிருப்பது கண்டுபிடிக்கப்பட்டது. இதனையடுத்து ரேஷன் அரிசி, கடத்துவதற்குப் பயன்படுத்தப்பட்ட இரு சக்கர வாகனத்தை பறக்கும் படையினர் பறிமுதல் செய்தனர். சட்ட விரோதமாக செயல்பட்ட ஆலைக்கு அலுவலர்கள் சீல் வைத்தனர்.

வருவாய்த்துறையினர் பறிமுதல் செய்த அரிசி, இருசக்கர வாகனம் ஆகியவற்றை மாவட்ட ஆட்சியர் அலுவலகத்தில் உள்ள கிடங்கில் வைத்தனர். மேலும் அலுவலர்கள் வருவதை அறிந்து தலைமறைவான ஆலை உரிமையாளரைத் தேடி வருகின்றனர்.

இதையும் படிங்க: மூன்று டன் கடத்தல் ரேஷன் அரிசி, தொடர் சேஸிங் - மடக்கிப்பிடித்த அரசு அலுவலர்கள்!