‘தனி ஈழம் அமைக்க இலங்கை அதிபருக்கு அழுத்தும் கொடுங்கள்!’ - கே.எஸ். அழகிரி

கோவை: இலங்கையில் தமிழர்களுக்கு அதிகார பகிர்வு தந்து தமிழ் மாநிலம் அமைய பிரதமர் மோடி இலங்கை அதிபருக்கு அழுத்தம் தர வேண்டும் என தமிழ்நாடு காங்கிரஸ் தலைவர் கே.எஸ். அழகிரி வலியுறுத்தியுள்ளார்.

கோவை விமான நிலையத்தில் தமிழ்நாடு காங்கிரஸ் தலைவர் கே.எஸ். அழகிரி செய்தியாளர்களைச் சந்தித்தார். அப்போது அவர் கூறுகையில், ‘பாஜக அரசின் தவறான பொருளாதார கொள்கையினால் கடந்த எட்டு ஆண்டுகளை விட மிக மோசமான நிலையில் நாடு உள்ளது. ஆறாண்டு காலத்தில் நாடு எவ்வளவு சீரழிந்துள்ளது என்பதை இந்தப் பொருளாதாரக் கொள்கை காட்டுகிறது.

இலங்கையில் அனைவருக்கும் அதிகாரப் பகிர்வு வர வேண்டும். எனவே இலங்கை அதிபர் கோத்தபய ராஜபக்சவிற்கு பிரதமர் மோடி ஒரு அழுத்தத்தை தரவேண்டும். இலங்கையின் வட கிழக்கு மாகாணங்களை ஒருங்கிணைத்து தமிழர்களுக்கு அதிகார பகிர்வு தந்து அங்கு தமிழ் மாநிலம் அமைய மோடி இலங்கை அதிபருக்கு அழுத்தம் தர வேண்டும்’ என்றார்.

தொடர்ந்து பேசிய அவர், உள்ளாட்சி தேர்தலில் மறைமுகமாக ஆள் தூக்கும் வேலையை ஆளுகின்ற அரசு செய்யும் என்பதால் நேரடி தேர்தல்தான் வேண்டும் என திமுக மட்டும் வழக்கு போடவில்லை, அதிமுகவின் தோழமைக் கட்சிகளும் வழக்கு தொடர்ந்துள்ளன.

மகாராஷ்ராவில் பாஜக எப்படி ஆட்சி அமைத்தது என்பதை மக்கள் புரிந்து கொண்டார்கள், குடியரசுத் தலைவரும், ஆளுநரும் அரசியலமைப்புச் சட்டத்தை காக்க வேண்டும். அவர் செய்யாததால் உச்ச நீதிமன்றம் செய்துள்ளது என்றார்.

இதையும் படிங்க: 'மகாராஷ்டிரா அரசியல் விவகாரத்தில் உச்ச நீதிமன்ற தீர்ப்பை வரவேற்கிறேன்' - கே.எஸ் அழகிரி