20 பேர் வாபஸ் எதிரொலி: ஊராட்சித் தலைவர், வார்டு உறுப்பினர்கள் போட்டியின்றி தேர்வு - கோலார்பட்டியில் கோலோச்சிய அமைச்சர்!

கோவை: கால்நடைத் துறை அமைச்சர் உடுமலை ராதாகிருஷ்ணனின் சொந்த ஊரில் ஊராட்சித் தலைவர் பதவிக்கு மனு தாக்கல் செய்திருந்த மூவரில் இரண்டு பேர் மனுவை திரும்பப் பெற்றதால் அதிமுகவைச் சேர்ந்த ஆறுமுகச்சாமி போட்டியின்றி ஊராட்சித் தலைவராக தேர்வு செய்யப்பட்டுள்ளார்.

தமிழ்நாட்டில் உள்ளாட்சித் தேர்தலுக்கான வேட்புமனு தாக்கல் டிசம்பர் 9ஆம் தேதி தொடங்கி டிசம்பர் 16ஆம் தேதிவரை நடைபெற்றது. இதன்பின்னர் வேட்புமனுக்கள் பரிசீலிக்கப்பட்டன. இந்நிலையில், வேட்புமனுவை திரும்பப்பெறும் இறுதிநாளான நேற்று பொள்ளாச்சி தெற்கு ஒன்றியத்தில் வார்டு உறுப்பினர்களுக்குத் தாக்கல் செய்தவர்கள், 32 ஊராட்சித் தலைவர்கள், 37 ஒன்றிய கவுன்சிலர்கள்,12 மாவட்ட கவுன்சிலர்களின் வேட்புமனுக்கள் திரும்பப் பெறப்பட்டன.

இதையடுத்து தேர்தல் களம் காணும் வேட்பாளர்களுக்கு சின்னம் ஒதுக்கப்பட்டது. கால்நடைத் துறை அமைச்சர் உடுமலை ராதகிருஷ்ணனின் சொந்த ஊரான கோலார்பட்டியில் ஊராட்சி மன்றத் தலைவர் பதவிக்கு மூன்று பேர் வேட்புமனு தாக்கல் செய்திருந்த நிலையில் இரண்டு பேர் திரும்பப் பெற்றதால் அதிமுக சார்பில் போட்டியிட்ட ஆறுமுகச்சாமி என்பவர் போட்டியின்றி தேர்வு செய்யப்பட்டார்.

மேலும், வார்டு உறுப்பினர் பதவிக்கு வார்டுக்கு மூன்று பேர் வீதம் 27 பேர் மனுதாக்கல் செய்திருந்த நிலையில் 18 பேர் மனுவை திரும்பப் பெற்றதனால் ஒன்பது பேர் போட்டியின்றி தேர்வு செய்யப்பட்டனர். போட்டியின்றி தேர்வு செய்யப்பட்ட ஆறுமுகச்சாமி, வார்டு உறுப்பினர்கள் அமைச்சர் உடுமலை ராதகிருஷ்ணனைச் சந்தித்து வாழ்த்துகளைப் பெற்றுச் சென்றனர்.

இதையும் படிங்க: திருமா, சித்தார்த் உட்பட 600 பேர் மீது வழக்குப் பதிவு!