கோவை பாலமலை வனப்பகுதியில் கஞ்சா வளர்ப்பு; முதியவர் உட்பட 4 பேர் கைது

கோவையில் பாலமலை வனப்பகுதியில் பயிரிடப்பட்டிருந்த, 15 கிலோ மதிப்பிலான 300 கஞ்சா செடிகளை காவல்துறையினர் தீயிட்டு அழித்தனர்.

கோயம்புத்தூர்: பெரியநாயக்கன்பாளையம் வனச்சரகத்திற்குட்பட்ட, பாலமலை அடுத்த பசுமணி கிராமத்தில் 100-க்கும் மேற்பட்ட பழங்குடியின மக்கள் வசித்து வருகின்றனர். இவர்கள் கால்நடைகள் வளர்ப்பு, வனத்திற்குள் தேன் மற்றும் மூலிகை செடிகளை சேகரித்து விற்பனை செய்தல் மற்றும் விவசாயத்தை பிரதானத் தொழிலாக செய்து வருகின்றனர்.

அடர்ந்த வனப்பகுதிக்குள் வசிக்கும் இவர்கள் முக்கிய நிகழ்வுகளுக்காக மட்டுமே நகர் பகுதிக்கு வருகின்றனர். இந்நிலையில் மாவோயிஸ்ட் தேடுதல் வேட்டையில் ஈடுபட்டுள்ள நக்சல் தடுப்புப் பிரிவு காவல்துறையினர், பாலமலை பகுதியில் வழக்கமான ரோந்துப் பணியில் ஈடுபட்டிருந்தனர்.

அப்போது பசுமணி கிராமத்திற்கு அருகே வனப்பகுதியில், கஞ்சா செடிகள் பயிரிடப்பட்டிருந்ததை கண்டுபிடித்தனர். இதனை அடுத்து உயர் அதிகாரிகளுக்கு தகவல் தெரிவிக்கப்பட்டது. அதன் பின் சம்பவ இடத்திற்கு வந்த மாவட்ட காவல் கண்காணிப்பாளர் பத்ரி நாராயணன் தலைமையிலான காவல் துறையினர் மற்றும் வனத்துறையினர், அங்கு காய்கறி செடிகளுக்கிடையே பயிரிடப்பட்டிருந்த 15 கிலோ மதிப்புள்ள 300 கஞ்சா செடிகளை பிடுங்கி, தீயிட்டு அழித்தனர்.

இதுகுறித்து விசாரணை மேற்கொண்டதில் கஞ்சா செடிகளை பயிரிட்டது பசுமணி கிராமத்தைச் சேர்ந்த செல்லன்(60), பழனிச்சாமி (60), ராஜப்பன் (33) மற்றும் வேலுச்சாமி (26) ஆகியோர் எனத் தெரியவந்தது. இதனையடுத்து அவர்களை கைது செய்த காவல் துறையினர், நீதிமன்றத்தில் ஆஜர்படுத்தி சிறையில் அடைத்தனர்.

இதுகுறித்து காவல் துறையினர் கூறுகையில், ”வனப்பகுதிக்குள் உள்ள பழங்குடியின மக்கள், இது போன்ற செயல்களில் ஈடுபடக்கூடாது. அவர்களுக்குத் தேவையான அனைத்து உதவிகளையும் அரசும் மாவட்ட நிர்வாகமும் செய்து வரும் நிலையில், சட்டவிரோதச் செயல்களில் ஈடுபட்டால் அவர்கள் கைது செய்யப்படுவார்கள்” என எச்சரிக்கை விடுத்தார்.

இதையும் படிங்க:தூத்துக்குடியில் இருந்து இலங்கைக்கு பீடி இலை கடத்திய 6 மீனவர்கள் கைது!