கோவை மாவட்ட சிபிஎம் அலுவலகத்தில் செய்தியாளர்களை சந்தித்த அவர், “இந்தியா ஒரு மதசார்பற்ற நாடு. அதனை குடியுரிமை சட்டம் என்ற பெயரில், மதத்தின் அடிப்படையில் அடையாளப்படுத்த மத்திய அரசு முயல்கிறது. மதத்தின் அடிப்படையில் மக்களை பிரித்தாளும் இத்தகைய இழிவான அரசியலை செய்து வருவது கண்டிக்கத்தக்கதாகும்.
குடியுரிமை திருத்தச் சட்டம் என்பது இஸ்லாமியர்களுக்கு மட்டும் பாதிப்பானது அல்ல. அனைத்து தரப்பினருக்கும் எதிரானது. டெல்லியில் மக்கள் வீதிக்கு வந்து அறவழியில் போராடும் நிலையில் ஆர்எஸ்எஸ் அமைப்பும், பாஜகவும், அதை கலைக்க கொந்தளிப்பான நிலையை உருவாக்கி வருகின்றனர்.
மத்திய உள்துறை அமைச்சகத்தின் கட்டுப்பாட்டில் இயங்குகிற டெல்லி காவல்துறையானது, டெல்லியில் ஏற்பட்ட வன்முறையை தடுக்க எவ்வித நடவடிக்கையும் எடுக்காமல் வேடிக்கைப் பார்த்து வருகிறது. இதனால் டெல்லி காவல் துறையும் வன்முறையை தூண்டுபவர்களுக்கு ஆதரவாக செயல்படுகிறதோ என்ற எண்ணம் ஏற்படுகிறது.