ஆயிரமாண்டுகள் பழமையான 'பதிமலை குகை' ஓவியங்களைப் பாதுகாக்க மக்கள் கோரிக்கை!

கோவை: அழிந்து வரும் நிலையில் உள்ள 'பதிமலை குகை' ஓவியங்களைப் பாதுகாக்க வேண்டும் என வரலாற்று ஆய்வாளர்களும், சமூகச் செயற்பாட்டாளர்களும் கோரிக்கை விடுத்துள்ளனர்.

கோவை மாவட்ட வனப்பகுதிகளுக்கு இடையே உள்ள பாலக்காட்டு கணவாய் என்பது தமிழக - கேரளாவை இணைக்கும் வழித்தடமாகவும், யானைகளின் வாழ்விடமாகவும் இருந்து வருகிறது. மேலும் இந்தப் பகுதி முன்னொரு காலத்தில் யானைகளை பழக்கப்படுத்தி விற்கும் சந்தையாகவும் இருந்துள்ளது. அந்த வரலாற்றுத் தொடர்புகள் கோவை குமிட்டிபதி அருகே பதிமலையில் குகை ஓவியங்களாக வரையப்பட்டுள்ளன. இந்த ஓவியங்கள் சுமார் 3 ஆயிரம் ஆண்டுகளுக்கு முன் வரையப்பட்டதாகும்.

வெண்மையான திரவியத்தைக் கொண்டு இந்த ஓவியங்கள் வரையப்பட்டுள்ளன. இந்த ஓவியத்தில் யானை ஒன்றின் மீது பாகன் அமர்ந்து செல்லும் காட்சியும், அதனைச் சுற்றி பெரிய பெரிய குறுக்கும் நெடுக்குமாக பல கோடுகளும் வரையப்பட்டுள்ளன. மேலும் தேரை முன்னும் பின்னும் வடம்பிடித்து மனிதர்கள் செல்லும் காட்சியும் அங்கு ஓவியமாக வரையப்பட்டுள்ளது. பழங்கால மக்கள் தங்கள் வாழ்க்கை முறையை எதிர்கால சந்ததிக்குத் தகவலாக தெரிவிக்கும் வகையில் இந்த ஓவியம் உருவாக்கப்பட்டிருப்பதாகத் தெரிகிறது.

இத்தகைய பழமை வாய்ந்த இந்த ஓவியங்கள் தற்போது அழியும் தருவாயில் உள்ளது. இதற்குக் காரணம் மலைப் பகுதிக்குச் செல்லும் சிலர் குகைக்குள் அடுப்பு மூட்டி சமைப்பதும், அங்கே மது அருந்திவிட்டு குகையில் உள்ள ஓவியங்களை சேதப்படுத்துவதும்தான் என்று கூறப்படுகிறது.

குகை ஓவியங்கள் பலவும் எளிதில் பார்க்க முடியாத வகையில் அடர்ந்த வனப்பகுதிக்குள் இருக்கும் நிலையில், குமிட்டிபதி பதிமலை ஓவியங்கள் எளிதில் பார்க்கும் வகையில் உள்ளது. ஆனால் தற்போது அந்த இடம் மது அருந்தும் இடமாகவும், சமூக விரோத செயல்கள் நடைபெறும் இடமாகவும் இருப்பது வேதனையளிக்கிறது. இதை தொல்லியல்துறை புனரமைத்து பாதுகாக்கவேண்டும் என வரலாற்று ஆய்வாளர்களும், சமூகச் செயற்பாட்டாளர்களும் கோரிக்கை விடுத்துள்ளனர்.

பழமையான இந்த குகை ஓவியங்களை அடுத்த தலைமுறைக்குக் கொண்டு சேர்க்க வேண்டும் என்பதே அனைவரின் விருப்பமாகவுள்ளது.