கோயம்புத்தூர்:பொள்ளாச்சி கோவை சாலையில் உள்ள தனியார்ப் பள்ளியில் (PKD மெட்ரிக் மேல் நிலைப்பள்ளி) அரசின் 25 சதவிகித இலவச கல்வித் திட்டத்தின் கீழ் கடந்த ஆண்டு 15 குழந்தைகள் தேர்வு செய்யப்பட்டு பள்ளியில் சேர்க்கப்பட்டனர். தற்போது ஓராண்டு கழித்துத் தேர்வு செய்யப்பட்ட 15 குழந்தைகளில் ஐந்து குழந்தைகளுக்கு இந்த திட்டத்தின் கீழ் அரசு ஒப்புதல் வழங்கவில்லை என்று கூறி பள்ளி நிர்வாகம் மாணவர்களின் பெற்றோர்களிடம் கல்விக் கட்டணம் செலுத்த வலியுறுத்தியுள்ளது.
இல்லை என்றால் தங்கள் பிள்ளைகளைப் பள்ளிக்கு அனுப்ப வேண்டாம் என்றும் கூறியதாகத் தெரிகிறது. இதனால் செய்வதறியாத பெற்றோர்கள் பள்ளி முன்பு முற்றுகையிட்டனர். பெற்றோர்கள் மற்றும் பள்ளி நிர்வாகம் இருவருக்கும் இடையே நடந்த பேச்சுவார்த்தையில் பள்ளி நிர்வாகம் தங்களுக்கும் இதற்கும் சம்பந்தம் இல்லை. இதுவரை மாவட்ட கல்வி அலுவலகத்திலிருந்து எந்த ஒரு ஒப்புதல் கடிதமும் வரவில்லை என்று பெற்றோர்களிடம் தெரிவித்ததாகத் தெரிகிறது.