கோயம்புத்தூர்:ஞாயிற்றுக்கிழமை (அக் 23) கோவை உக்கடம் கோட்டைமேடு ஈஸ்வரன் கோயில் முன்பு, சிலிண்டர் வெடித்ததில் கார் வெடித்து சிதறியது. இதில் ஜமேஷா முபின் என்ற இளைஞர் உயிரிழந்தார். பின்னர் நடத்தப்பட்ட விசாரணையில், உக்கடம் மற்றும் ஜி.எம்.நகரைச் சேர்ந்த 5 பேரை காவல்துறையினர் கைது செய்தனர்.
தொடர்ந்து அவர்கள் 15 நாட்கள் நீதிமன்ற காவலில் வைக்கப்பட்டுள்ளனர். மேலும் இதுதொடர்பாக உபா சட்டத்தின்கீழ் வழக்குப்பதிவு செய்யப்பட்ட நிலையில், தேசிய புலனாய்வு முகமை விசாரணை நடத்துவதற்கு முகாந்திரம் உள்ள வழக்காக கருதப்பட்டுள்ளது.
இதன்படி வழக்குப்பதிவு செய்வதற்கு முன்பாக முதற்கட்ட கள ஆய்வு மேற்கொள்வதற்காக, நேற்று (அக் 25) இரவு விமானம் மூலம் தேசிய புலனாய்வு முகமை அலுவலர்கள் கோவை சென்றுள்ளனர். இதனையடுத்து இன்று (அக் 26) காலை முதல் என்ஐஏ அலுவலர்கள் தங்களது சோதனையைத் தொடங்கி உள்ளனர்.