‘வாக்கி டாக்கி ஊழலில் அமைச்சர்களுக்கு தொடர்பு’ - முத்தரசன் குற்றச்சாட்டு

கோவை: காவல்துறையில் நடைபெற்ற வாக்கி டாக்கி ஊழலில் அமைச்சர்களுக்கும் காவல்துறையில் உயர் பதவிகளிலில் இருப்பவர்களுக்கும் தொடர்பு உள்ளது என்று இந்திய கம்யூனிஸ்ட் கட்சியின் மாநிலச் செயலாளர் முத்தரசன் தெரிவித்துள்ளார்.

இந்திய கம்யூனிஸ்ட் கட்சியின் மாநிலச் செயலாளர் முத்தரசன், கோவையிலுள்ள அக்கட்சியின் அலுவலகத்தில் செய்தியாளர்களைச் சந்தித்தார். அப்போது பேசிய அவர், “தமிழ்நாட்டில் ஜனநாயகம் இருக்கிறதா இல்லையா என்ற சந்தேகம் எழுகிறது. குடியுரிமை திருத்தச் சட்டத்திற்கு எதிரான போராட்டங்களுக்கு காவல்துறை அனுமதி மறுக்கிறது. அதேசமயம் போராட்டம் நடத்துவதற்கு வாய்மொழியாக அனுமதி கொடுத்துவிட்டு பின்னர் வழக்கு தொடுக்கப்படுகிறது” என்று தெரிவித்தார்.

டெல்டா மாவட்டங்களை வேளாண் பாதுகாப்பு மண்டலமாக அறிவித்திருப்பதை வரவேற்பதாக தெரிவித்த அவர், ஹைட்ரோ கார்பன் திட்டத்தைச் செயல்படுத்த மத்திய அரசு பல்வேறு நிறுவனங்களுக்கு வழங்கிய அனுமதி ரத்து செய்யப்படுமா என்பது குறித்து முதலமைச்சர் விளக்கவேண்டும் எனவும் தெரிவித்தார்.

மேலும், உள்ளாட்சித் தேர்தல் நடைபெறாத இடங்கள் மற்றும் நகர்ப்புறங்களில் தேர்தலை நடத்துவதற்கு அரசு விரைந்து நடவடிக்கை எடுக்கவேண்டும் என்று வலியுறுத்திய அவர், டிஎன்பிஎஸ்சி முறைகேடு மற்றும் வாக்கி டாக்கி ஊழல் உள்ளிட்டவற்றில் அமைச்சர்களுக்கும், உயர் பதவிகளிலில் இருப்பவர்களுக்கும் தொடர்பு இருக்கிறது என்று குற்றஞ்சாட்டினர்.

எஸ்சி மற்றும் எஸ்டி பதவி உயர்வு இட ஒதுக்கீடு குறித்து உச்சநீதிமன்றம் வழங்கியுள்ள தீர்ப்பு குறித்து பேசுகையில், உச்ச நீதிமன்றத்தின் தீர்ப்பு மிகுந்த கவலையளிக்கிறது என்றும், இது சமூகநீதிக்கு எதிரானது எனவும் தெரிவித்தார்.

இதையும் படிங்க: மத்திய பட்ஜெட்டை எதிர்த்து போராட்டம்- முத்தரசன்