அமைச்சர் உதயநிதி ஸ்டாலின் நிகழ்ச்சி; வெயிலில் காக்க வைக்கப்பட்ட விளையாட்டு வீரர்கள்

அமைச்சர் உதயநிதி ஸ்டாலின் கலந்துகொண்ட நிகழ்ச்சிக்காக இரண்டு மணி நேரத்திற்கும் மேலாக குழந்தைகளும், மாற்றுத்திறனாளி விளையாட்டு வீரர்களும் வெயிலில் காத்திருக்க வைக்கப்பட்டதால் அவதிக்குள்ளாகினர்.

கோவை: இளைஞர் நலன் மற்றும் விளையாட்டு மேம்பாட்டுத் துறை அமைச்சர் உதயநிதி ஸ்டாலின் அமைச்சராக பொறுப்பேற்ற பின் முதல்முறையாக இன்று கோவை வந்தார். உதயநிதி ஸ்டாலின் வருகையை முன்னிட்டு பலத்த போலீஸ் பாதுகாப்பு ஏற்பாடுகள் செய்யப்பட்டு இருந்தன. அவர் செல்லக்கூடிய வ.உ.சி மைதானம், மாவட்ட ஆட்சித்தலைவர் அலுவலகம், கொடிசியா மைதானம் உள்ளிட்டப் பகுதிகளில் ஏராளமான கட்சித்தொண்டர்கள், கட்சிக்கொடிகளுடன் அமைச்சர் உதயநிதி ஸ்டாலினை வரவேற்றனர்.

இதனையடுத்து முதல்நிகழ்வாக நேரு விளையாட்டு அரங்கம் வந்த அமைச்சர் உதயநிதி ஸ்டாலின் செயற்கை இழை ஓடுபாதை அமைப்பது மற்றும் 65 லட்ச ரூபாய் மதிப்பீட்டில் சிறப்பு மராமரத்துப் பணிகள் ஆகியவற்றிற்கு அடிக்கல் நாட்டினார். இந்த நிகழ்வில் மின்சாரத்துறை அமைச்சர் செந்தில் பாலாஜி, கோவை மாவட்ட ஆட்சியர் சமீரன், கோவை மாநகராட்சி ஆணையர் பிரதாப் உள்ளிட்ட அதிகாரிகள் பங்கேற்றனர். நிகழ்ச்சிக்குப் பின்னர் அமைச்சர் உதயநிதி ஸ்டாலின் விளையாட்டு வீரர்களுடன் புகைப்படம் எடுத்துக்கொண்டார்.

கோவை நேரு விளையாட்டு அரங்கில் அமைச்சர் உதயநிதி ஸ்டாலின் பங்கேற்கும் இந்த விழாவிற்காக காலை 8.30 மணி முதலே குழந்தைகள் திறந்த வெளியில் அமர வைக்கப்பட்டனர். அமைச்சர் உதயநிதி ஸ்டாலின் 11.45 மணிக்கு விழா மேடைக்கு வந்தார். அதுவரை சுமார் 2 மணி நேரத்துக்கு மேலாக குழந்தைகளும், மாற்றுத்திறனாளி விளையாட்டு வீரர்களும் வெயிலில் அமர வைக்கப்பட்டிருந்ததால் அவர்கள் அவதிக்குள்ளாகினர்.

முன்னதாக 10 மணிக்கு விழா நடைபெறும் என அறிவிக்கப்பட்டதால் குழந்தைகள், மாற்றுத்திறனாளி வீரர்கள் விழாவிற்கு சீக்கிரமாக அழைக்கப்பட்டுள்ளனர்.