சிறப்பாகப் பணியாற்றிய வனத் துறையினருக்கு கேடயம்!

கோவை: ஆனைமலை புலிகள் காப்பகத்தில் சிறப்பாகப் பணியாற்றிய வனத் துறையினருக்கு கேடயம், சான்றிதழ்களை பொள்ளாச்சி கோட்ட உதவி கள இயக்குநர் வழங்கினார்.

கோவை மாவட்டம் வால்பாறையை உள்ளடக்கிய பகுதியாக ஆனைமலை புலிகள் காப்பகம் உள்ளது. அதில் வால்பாறை, பொள்ளாச்சி, மானாம்பள்ளி, டாப்சிலிப் என நான்கு வனச்சரகங்கள் உள்ளன.

சான்றிதழ் வழங்கல்

இவற்றில் சுமார் 500-க்கும் மேற்பட்டவர்கள் வனத்தைக் காப்பது, வன விலங்குகளைக் காப்பது, மனித வன உயிரின மோதலைத் தடுப்பது போன்ற பணிகளில் ஈடுபட்டுவருகிறார்கள்.

இவர்களை ஊக்குவிக்கும்பொருட்டு வால்பாறை அட்டகட்டி பயிற்சி மையத்தில் நடைபெற்ற விழாவில், ஆனைமலை புலிகள் காப்பக பொள்ளாச்சி கோட்ட உதவி கள இயநக்குநர் ஆரோக்கியராஜ் சேவியர் தலைமையில், அடர்ந்த வனப்பகுதிகளில் பணியாற்றும் வன ஊழியர்களை ஊக்குவிக்கும்பொருட்டு அவர்களுக்கு கேடயமும் சான்றிதழ்களும் வழங்கப்பட்டன. மேலும் அவர்களின் பணி தொய்வின்றி நடைபெற புதிய சீருடைகள், சூ, தொப்பிகள் வழங்கப்பட்டன.

வனத்துறை

மேலும் பொள்ளாச்சி அரிமா சங்கம் சார்பில் வன ஊழியர்களுக்கு ஒரு லட்சத்து 30 ஆயிரம் மதிப்பிலான மழைநீர் புகாத ஆடைகள் (Rain Coats) வழங்கப்பட்டன.

விழாவில் பேசிய உதவி கள இயக்குநர் ஆரோக்கியராஜ் சேவியர், "ஒவ்வொரு வன ஊழியருக்கும் தங்களுக்கு வழங்கப்பட்டுள்ள பணியை சிறப்பாகச் செய்ய வேண்டும்.

தமிழ்நாட்டில் உள்ள புலிகள் சரணாலயத்தில் நம்முடைய ஆனைமலை புலிகள் காப்பகம் மிகச்சிறந்தது என்று பெயரெடுக்க வேண்டும். நீங்கள் அனைவரும் முழுமையான ஈடுபாட்டுடன் கடமையை ஆற்ற வேண்டும். தொடர்ந்து உங்களுடைய தேவைகளை அறிந்து செய்துதரப்படும்" என்று கூறினார்.

கோப்பை வழங்கல்

விழாவில் உதவி வனப்பாதுகாவலர் செல்வம், வனச்சரகர்கள், வனவர்கள், அரிமா சங்கம் மாவட்ட ஆளுநர் தர்மராஜ் ஆகிய 300-க்கும் மேற்பட்ட வனத் துறையினர் முகக்கவசம் அணிந்து தகுந்த இடைவெளியைக் கடைப்பிடித்து கலந்துகொண்டனர்.

இதையும் படிங்க:சிங்கங்களை அசால்ட்டாக பராமரிக்கும் பெண் வனத்துறை அலுவலர்கள்!