கோவை மாவட்டம் சூலூர் அருகேயுள்ள காங்கேயம்பாளையம் பகுதியைச் சேர்ந்தவர் மணி (61). இவரது மனைவி சகுந்தலா (55). இருவரும் வீட்டிலேயே மெழுகுவர்த்தி செய்யும் தொழிலில் ஈடுபட்டு வருகின்றனர். மேலும் இவரது வீட்டின் அருகிலேயே சகுந்தலாவின் மாமன் மனைவி ராமாத்தாள் (80), சொந்தமாக தங்க நகைகள் அடமானத் தொழில் நடத்திவருகிறார்.
இந்நிலையில் சகுந்தலாவிற்கும், ராமாத்தாளுக்கும் ஏற்கெனவே குடும்பத் தகராறு இருந்துவந்ததாகக் கூறப்படுகிறது. இதனையடுத்து இன்று காலை கடைக்குச் சென்றுவிட்டு வீடு திரும்பிய சகுந்தலா, தனது உறவினர் சக்திவேல் என்பவருடன் நடந்து வந்துள்ளார். அப்போது அவர்களைக் கண்ட ராமாத்தாள், பாட்டிலில் மறைத்து வைத்திருந்த ஆசிட்டை அப்பெண் மீது வீசியுள்ளார்.