ஆழியார் அணை பகுதியில் நடமாடும் காட்டு யானை - தீவிர கண்காணிப்பில் வனத்துறையினர்

கோயம்புத்தூர்: பொள்ளாச்சியை அடுத்துள்ள ஆழியார் அணை அருகே ஒற்றை காட்டு யானை நடமாடுவதால், வனத்துறையினர் தீவிர கண்காணிப்புப் பணியில் ஈடுபட்டுவருகின்றனர்.

பொள்ளாச்சியை அடுத்த ஆழியார் அணையை ஒட்டியுள்ள வனப்பகுதிகள், ஆனைமலை புலிகள் காப்பகத்துக்கு உட்பட்ட பகுதிகள் என்பதால் விலங்குகளின் நடமாட்டத்தை வனத்துறையினர் கண்காணித்து வருகின்றனர். மேலும், தீவிர வாகன ரோந்து பணியிலும், குழுக்களாக கண்காணிக்கும் பணியிலும் வனத்துறையினர் ஈடுபட்டுவருகின்றனர்.

இதையடுத்து மாலை ஆழியாறு குரங்கு அருவி அருகே ஒற்றை ஆண் காட்டு யானை ஒன்று சாலையைக் கடக்க முயன்றது. சுற்றுலாப் பயணிகள் கூட்டம் அதிகம் இருந்ததால் ஒலிபெருக்கி மூலம் சுற்றுலாப் பயணிகளுக்கு எச்சரிக்கை கொடுத்து பத்திரமாக காட்டு யானை வனப்பகுதிக்குள் விரட்டப்பட்டது.

மேலும் காட்டு யானையை வனச்சரகர் காசிலிங்கம் தலைமையில் வனத்துறையினரும் வேட்டை தடுப்பு காவலர்களும் யானை குடியிருப்புப் பகுதிக்குள் நுழையாமல் இருக்க தொடர்ந்து கண்காணித்துவருகின்றனர்.