கோவை தனியார் மருத்துவமனையில் தீ விபத்து

கோவை: தனியார் மருத்துவமனையில் மின் கசிவால் ஏற்பட்ட தீ விபத்தை தீயணைப்பு வீரர்கள் போராடி அணைத்தனர்.

கோவை தனியார் மருத்துவமனையின் பின் பகுதியில் உள்ள டயாலிசிஸ் பிரிவில், 40க்கும் மேற்பட்ட நோயாளிகள் சிகிச்சை பெற்று வருகின்றனர். இதன் அருகில் உள்ள மருந்து கிடங்கில், இங்கு புதன்கிழமை இரவு திடீரென கரும் புகை வெளியாகி, தீ பரவியது.

இதையடுத்து மருத்துவமனை நிர்வாகத்தினர் அப்பகுதியில் இருந்து நோயாளிகளை அருகே உள்ள பிரிவுகளுக்கு மாற்றினர். மேலும், தீயணைப்பு துறைக்கு தகவல் கொடுத்தனர். இதையடுத்து உதவி மாவட்ட அலுவலர் தவமணி உத்தரவின்பேரில் நிலைய அலுவலர் ராமச்சந்திரன் தலைமையில் 12 பேர் கொண்ட தீயணைப்பு வீரர்கள் உடனடியாக மருத்துவமனைக்கு சென்றனர்.

தீயணைப்புத் துறை வீரர்களின் முயற்சியால் சுமார் 20 நிமிடத்தில் தீ முழுமையாக அணைக்கப்பட்டது. இந்த சம்பவம் தொடர்பாக பந்தய சாலை காவல்துறையினர், விசாரணை மேற்கொண்டு வருகின்றனர்.

மேலும், காவல்துறையினர் நடத்திய முதற்கட்ட விசாரணையில் மின்கசிவால் தீ விபத்து ஏற்பட்டிருப்பது தெரியவந்துள்ளது.