தண்ணீர் தேடி ஊருக்குள் புகுந்த காட்டுயானை

கோவை: தடாகம் அருகே தாளியூர் கிராமத்தில் ஒற்றை காட்டு யானை தண்ணீர் தேடி ஊருக்குள் புகுந்ததால் பொதுமக்கள் பீதியடைந்தனர்.

கோவை மாவட்டம் தடாகத்தை அடுத்த தாளியூர் கிராமத்தில் நேற்று இரவு 11 மணி அளவில் ஒற்றை காட்டு யானை ஒன்று வனப்பகுதியில் இருந்து வெளியேறி ஊருக்குள் புகுந்தது.

தண்ணீர் தேடி ஊருக்குள் வலம்வந்த அந்த காட்டு யானை , நாகராஜ் என்பவர் வீட்டின் முன்பு டிரம்மில் வைக்கப்பட்டிருந்த தண்ணீரை குடித்தது.

தண்ணீர் போதுமானதாக இல்லாத நிலையில் அருகில் வைக்கபட்டிருந்த பாத்திரங்களிலும் துதிக்கை விட்டு உறிஞ்சிப்பார்த்த யானை, பின்னர் அங்கிருந்து வேறு இடத்திற்கு நகர்ந்து சென்றது.

யானை ஊருக்குள் புகுந்ததை அறிந்த பொதுமக்கள் உடனடியாக இதுகுறித்து வனத்துறையினருக்கு தகவல் தெரிவித்தனர். தொடர்ந்து அங்கு வந்த வனத்துறையினருடன் சேர்ந்து கிராமமக்கள் யானையை காட்டுக்குள் விரட்டினர்.