வெறி நாய் கடித்து 30 பேர் படுகாயம்

சேலம்: கிச்சிப்பாளையம் பகுதியில் வெறிநாய் ஒன்று கடித்ததில் சைக்கிளில் சென்றவர்கள் பாதசாரிகள் உள்ளிட்ட 30க்கும் மேற்பட்டவர்கள் காயமடைந்தனர்.

சேலம் கிச்சிப்பாளையம் பகுதியில் இன்று காலை வெறிநாய் ஒன்று அப்பகுதியில் வந்து வயதானவர்கள், சைக்கிளில் சென்றவர்கள் மற்றும் பாதசாரிகள் உள்ளிட்ட 30க்கும் மேற்பட்டவர்களை வெறித்தனமாக கடித்து குதறியது.

காயமடைந்த பொதுமக்கள் சிகிச்சைக்காக சேலம் அரசு பொது மருத்துவமனையில் வந்தனர். இவர்களுக்கு உரிய சிகிச்சை அளிக்கப்படாமல் மருத்துவமனை வாசலில் அமர வைக்கப்பட்டிருந்தனர்.

வெறிநாய் கடிக்கு உரிய மருந்து இருப்பு இல்லை என கூறியும் நாய் கடி பட்ட நபர்களை காத்திருக்கும்படி மருத்துவமனை நிர்வாகம் கூறியதால் பொதுமக்கள் சுமார் ஒரு மணி நேரமாக காத்து கிடந்தனர்.

பாதிக்கப்பட்ட மக்கள் கூறுகையில், சேலம் மாவட்டத்தில் நாய் கடிக்கும் சம்பவம் அடிக்கடி நடந்து வருகிறது, மாநகராட்சி நிர்வாகத்தின் சார்பில் நாங்கள் பலமுறை புகார் கொடுத்தும் எந்த ஒரு நடவடிக்கையும் எடுக்கவில்லை என்று புகார் கூறினார்கள்.